Ish Zv.Komandantit të Forcës Detare, Artur Meçollari ka folur për bazën detare të sekuestruar në Sarandë. Gjatë një interviste pë Euronews, ai foli për vendimin e gjykatës dhe shkeljet që janë bërë.
“Baza detare është krijuar për herë të parë bë vitin 1969 por ka marrë strukturë të plotë në vitin 1974. Baza gjendet në katër hektarë ndërsa pjesa tjetër janë jashtë planit të përhapjes. Baza dikur ka qenë më e madhe. Me zvogëlimin e kapaciteteve baza ngeli në 4 hektarë. Plani i përhapjes miratohet nga presidenti i Republikës, është aset strategjik i Shqipërisë dhe është përtej ligjit të administrimit të pronave publike”- tha ai.
Ndërkohë Gjykata e Posaçme Kundër Korrupsionit dhe Krimit të Organizuar, ka pranuar kërkesën e Prokurorisë së Posaçme për vënien nën sekuestro preventive të “Bazës Ndihmëse, Limion, Sarandë”, një bazë e Forcave Detare, pronë e ushtrisë shqiptare e cila në korrik të viti 2020, me vendim të qeverisë, i është dhënë me qira, si pjesë e një territori shumë më të madh, prej mbi 265 mijë metrash katrorë, bashkimit të shoqërive “Concord Investment” sh.p.k. dhe “Kastrati Group” sh.a., përfaqësuar nga shoqëria “Marina Bay Saranda” shpk, si qiramarrës. Shoqëria, sipas publikimeve në faqen e Concord Investment, parashikon ndërtimin e një kompleksi hotelesh, rezidencash dhe një port jahtesh që do të ofrojë mundësnë për ankorim, për 400 anije.
Sipas vendimit të Gjykatës, vlerësohet “i drejtë parashtrimi i prokurorit se duhet të ndërpritet kryerja e investimit në fushën e turizmit, apo dhe ndërtime të tjera nga investitori, mbi pronën 696 (Baza Ndihmëse, Limion), për arsye se disponimi lirisht i kësaj prone nga subjektet private, cënon gatishmërinë dhe operacionalitetin e Forcës Detare, operacionalitet i cili duhet të vazhdojë të kryhet nga organi kompetent që është Komanda e Forcës Detare, pa ndërhyrje të subjekteve private”.
