Kandidati i Partisë Demokratike për bashkinë e Tiranës, Belind Këlliçi ka nxjerrë zbuluar propagandën e investimeve të kryebashkiakut Erion Veliaj, duke zbuluar një zonë në Tiranë ku janë mbledhur 41 milionë euro nga taksa e arsimit dhe nuk ka asnjë investim në shkolla, kopshte apo çerdhe.
“Janë mijëra familje të cilat nuk kanë një çerdhe, kopsht apo shkollë për fëmijët në lagjen ku jetojnë. Harxhojnë orë të tëra çdo ditë për të çuar e marrë fëmijët në shkolla që janë kilometra larg”, shkruan Këlliçi në Facebook.
Kandidati i PD i referohet zonës së Kopshtit Zoologjik dhe Liqenit të Thatë që dikur ka qenë pjesë e ish-komunës Farkë, por me ndarjen e re administrative prej 2015 i përkasin bashkisë së Tiranës.
“Kryebashkiaku e ka braktisur Tiranën dhe nuk pyet për këto halle të përditshme të qytetarëve. Ai ka mbledhur mbi 41 milionë euro taksa për arsimin të cilat do kishin mjaftuar për ta ndërtuar një shkollë të re në këtë zonë të Tiranës”, shprehet ai.
Gjithashtu Këlliçi ka premtuar se ai do të realizojë një model krejt ndryshe të qeverisjes që i dëgjon qytetarët.
“Unë propozoj për të ardhmen një model krejt ndryshe të qeverisjes që i dëgjon qytetarët. Një qeverisje që përpiqet të krijojë kushte të denja jete duke ndërtuar çerdhe, kopshte e shkolla të reja atje ku ata kanë nevojë. Ju ftoj të jepni komentet tuaja për këtë problem që prek shumë lagje të Tiranës!”, nënvizon Këlliçi.
