Kreu i Partisë Demokratike, Sali Berisha do të mbledhë ditën e nesërme në orën 12:00, Kryesinë e PD-së.
Mbledhja do të zhvillohet në selinë blu, ku pritet të vendoset në lidhje me vazhdimësinë e aksionit opozitar dhe mënyrën se si PD do të garojë në zgjedhjet lokale.
Gjykata e Apelit vendosi këtë të premte që ta rrëzojë vendimin e Gjykatës së Shkallës së Parë, që i dha të drejtë Sali Berishës të marrë drejtimin e Partisë Demokatike si dhe vendosi që çështja të kthehet në rigjykim.
Pas verdiktit të gjykatës, Berisha në një deklaratë për media tha se vendimi ishte politik.
“Sot Edi Rama dha vendimin e tij me të cilin ka një synim, likuidimin e opozitës shqiptare dhe pluralizmit. Gjykata lexoi vendimin e përgatitur me kohë nga Rama. PD është sot një parti më e fuqishme se kurrë.
Do mbledhim së shpejti forumet drejtuese dhe do marrim të gjitha vendimet e duhura për të vijuar misionin tonë në mënyrën më të fuqishme”, theksoi ai.