Aksidenti tragjik që ndodhi në Greqi, ku u shënuan më shumë se 50 viktima, mban ‘të mbërthyer’ opinionin publik në Greqi, por jo vetëm.
Në spitalin e Larisës familjarët e viktimave po marrin trupat e të dashurve të tyre në arkivole të mbyllura, ndërsa disa prej trupave të paidentifikuar mbahen në një kamion frigoriferik pasi morgu është i mbushur plot.
Sipas urdhërit të autoriteteve, identifikimi bëhet përmes ADN-së, në mënyrë që të afërmit të identifikojnë njerëzit e tyre që kanë humbur pas aksidentit.
Midis prindërve fatkeqë që presin identifikimin e viktimave, apo diçka të re për personat që konsiderohen të humbur, janë edhe ata të Denis Rucit, 23-vjeçarit me origjinë shqiptare që ndodhej në vagonin 5 të trenit të vdekjes.
“Nuk kemi asnjë informacion ku gjendet, ishte te një prej vagonave ku u shpëtuan shumë të rinj. Ju lutem të gjithëve, bëj apel ndaj gjithë atyre të rinjve që ndodheshin në këtë vagon nëse e panë, qëndronte në karrigen me numër 22.
Nëse dikush do e njohë nga fotografitë ju lutem më njoftoni sepse nuk po e gjej djalin tim. Nuk e di në se ishte ulur në vendin e tij në momentin e përplasjes apo kishte shkuar në vagonin e restorantit”, thotë nëna e 23-vjeçarit, Mirela Ruçi.
Autoritetet greke deklarojnë se janë identifikuar të paktën 30 viktima, 52 të afërm të pasagjerëve kanë kryer testin e ADN-së, ndërsa 55 teste janë marrë nga trupat pa jetë.
