Një zbulim i jashtëzakonshëm ka befasuar botën shkencore: rrjeta më e madhe e merimangës në botë është gjetur në një shpellë squfuri në kufirin mes Shqipërisë dhe Greqisë.
Sipas një studimi të publikuar më 17 tetor në revistën Subterranean Biology, kolonia gjigante përbëhet nga mbi 111 mijë merimanga që kanë ndërtuar një rrjetë kolosale në një tunel të errët e të ngushtë të “Shpellës së Squfurit” në zonën e Sarantaporos.
Rrjeta shtrihet në një gjatësi prej 350 metrash përgjatë murit të shpellës dhe përbëhet nga një mozaik me mijëra rrjeta individuale në formë hinke. Ky fenomen përfaqëson provën e parë të sjelljes koloniale në dy specie të zakonshme merimangash, duke e bërë atë një rast unik në botë.
“Bota natyrore ende na ruan surpriza të panumërta. Kur pashë rrjetën, ndjeva admirim, respekt dhe mirënjohje. Duhet ta përjetosh për ta kuptuar vërtet,” – tha për Live Science udhëheqësi i studimit, profesori i biologjisë Istvan Urak nga Universiteti “Sapientia” në Rumani.
“Shpella e Squfurit” është formuar nga acidi sulfurik që krijohet nga oksidimi i sulfurit të hidrogjenit në ujërat nëntokësore, duke ofruar një mjedis ideal për zhvillimin e kolonisë së rrallë.
Kjo rrjetë gjigante nuk është parë për herë të parë tani – ajo u zbulua fillimisht nga Shoqata Speleologjike Çeke gjatë një ekspedite në vitin 2022 në Luginën e Bromoner. Më pas, një ekip shkencëtarësh e vizitoi sërish shpellën në vitin 2024 për të marrë mostra që ndihmuan në analizat e fundit të Urak.
