Kreu i Prokurorisë së Posaçme (SPAK), Altin Dumani, është shprehur se vendimi i Gjykatës Kushtetuese për kryebashkiakun e Tiranës, Erion Veliaj, nuk ndikon në hetimet penale që po zhvillon SPAK ndaj tij.
Në intervistën për emisionin “Trialog” në RTSH, Dumani theksoi se çështja e shqyrtuar nga Kushtetuesja kishte objekt tjetër dhe nuk lidhej me hetimin penal apo masën e sigurisë të vendosur ndaj Veliajt.
“Gjykata Kushtetuese ka patur në shqyrtim një objekt tjetër, shkarkimin dhe dekretin e Presidentit. Nuk ka lidhje me çështjen që ndjekim ne penalisht, nuk ka ndikim në hetimet tona apo masën e sigurisë që rëndon ndaj zotit Veliaj.
Nuk dua të futem në detaje, është gjykata që vendos nëse vazhdojnë apo jo të qëndrojnë kriteret për masën e sigurisë. Është ajo që shprehet”, tha Dumani.
Disa ditë më parë, Gjykata Kushtetuese vendosi të lërë në fuqi mandatin e Erion Veliajt si kryetar i Bashkisë së Tiranës dhe rrëzoi dekretin e Presidentit për zhvillimin e zgjedhjeve të pjesshme në kryeqytet.
