Kreu i Strukturës së Posaçme Kundër Korrupsionit dhe Krimit të Organizuar (SPAK), Altin Dumani, ka folur në emisionin “Trialog” në RTSH për mënyrën e punës së prokurorisë, prioritetet në hetime dhe sfidat me të cilat përballen prokurorët e institucionit.
Ai theksoi se SPAK nuk bën dallime sipas funksioneve politike apo fuqisë financiare:
“Të gjithë janë të barabartë para ligjit, pavarësisht funksionit që ata kanë, politik, publik apo fuqisë financiare që mbartin. Për ne është e rëndësishme prova, jo emri,” tha Dumani.
Ai hodhi poshtë akuzat për selektivitet dhe shtoi se SPAK ka treguar se është në gjendje të ndjekë penalisht çdo subjekt, me vendime të para të formës së prerë tashmë të dhëna ndaj zyrtarëve të lartë.
Dumani rrëfeu gjithashtu kërcënimet dhe presionet që ushtrohen ndaj prokurorëve të SPAK, përfshirë edhe drejtuesit e institucionit:
“Kërcënimet janë të shpeshta, përfshirë kërcënime ndaj familjarëve, telefonata kërcënuese dhe deri tek plane për atentate. Krimi i organizuar është shumë i sofistikuar.”
Ai theksoi se edhe politika ka shfaqur forma presioni përmes retorikës publike dhe sulmeve ndaj emrave të prokurorëve dhe familjarëve të tyre, por shtoi se stafi i SPAK është i përgatitur për t’i përballuar këto sfida.
“Pavarësisht kërcënimeve dhe sulmeve, prokurorët e SPAK kanë pjekurinë dhe maturinë e duhur për t’i përballuar. Por ky është një realitet i vështirë që nuk mund të anashkalohet,” shtoi Dumani.
Gjithashtu Dumani theksoi se krimi i organizuar gjen forma të ndryshme kërcënimi ndaj prokurorëve të posaçëm.
“Është pjesë e raportit faktikisht, raport i cili është publikuar edhe në faqen zyrtare të Prokurorisë së Posaçme. T’i ndajmë, kërcënimi nga krimi i organizuar, kërcënimet janë të shpeshta ndaj prokurorëve të posaçëm, përfshirë edhe drejtuesin e Prokurorisë së Posaçme. Niveli i kërcënimeve sa vjen edhe rritet. Si kemi reaguar ndaj kërcënimeve? Ku ka pasur vend kemi referuar materiale për fillimin e ndjekjes penale, ku prokurorë kanë qenë kallëzues, qoftë edhe në rolin e të dëmtuarit nga vepra penale. Ka metoda të ndryshme për të transmetuar një kërcënim te prokurorët e Posaçëm. Krimi i organizuar është shumë i sofistikuar. Por mund të them këtë që janë kërcënime të formës përmes telefonatave apo duke kërcënuar familjarë të prokurorëve të posaçëm, apo vetë prokurorëve të posaçëm, kërcënime madje me jetë, deri plane në realizimin e atentateve ndaj prokurorëve”, u shpreh Dumani,
Sa i takon kërcënimeve nga politika Dumani theksoi se ka një retorikë të politikës ndaj prokurorëve të posaçëm.
“Sa i takon kërcënimeve nga politika ju jeni vetë dëshmitarëm, nga mëngjesi deri në darkë, prokurorët e posaçëm me emra, me emra të përveçëm, me emra familjarësh, kërcënohen, baltosen, fyhen dhe kjo është formë presioni. Pavarësisht se prokurorët e posaçëm kanë pjekurinë e duhur, maturinë e duhur për t’i përballuar këto kërcënime. Ne jemi mjaftueshëm të përgatitur për t’i përballuar këto kërcënime. Por ky është një realitet. Si drejtues i prokurorisë së Posaçme nuk mund të rri e thënë”, tha Dumani.
I pyetur nëse politika ka shkuar përtej kësaj, Dumani tha se kërcënimet apo presionet janë ato “çfarë është thënë publikisht nga politika ju i keni të regjistruara në kronikat tuaja dhe në vlerësimin tim janë mjaftueshëm për t’u konsideruar si presione apo kërcënime”, tha Dumani.
