Pak minuta pasi në studion e “Opinion” tha se kurrë nuk do të ndërhyjë për t’u bërë presion gjyqtarëve që të vendosin në favor të tij për çështjen e “vulës” së Partisë Demokratike, teksa gjyqi zhvillohet nesër, Sali Berisha u gjend në Syri TV nga ku bëri një denoncim të fortë.
Në emisionin “Çim Peka Live”, Berisha akuzoi kryeministrin Edi Rama se synon të diktojë vendimin e Apelit dhe për këtë ka ngarkuar me detyrë të posaçme, Elira Kokonën, zëvëndesen e Sekretarit të Përgjithshëm të Kryeministrisë, Engjëll Agaçi, për t’i bërë presion gjyqtarëve që kanë në dorë vulën e PD.
“Çfarë di unë? Di që presione janë bërë. Rama ka ngarkuar Elira Kokonën, jo Don Agaçin. Dhe ajo është marrë intensivisht. Megjithatë sonte nuk preferoj të komentoj dhe diskutoj për vendimin e tre gjykatësve për të cilët unë nuk kam asnjë arsye të mos besoj në integritetin e tyre dhe në besnikërinë e ligjit e profesonit”, deklaroi Berisha.
Më tej kryetari i PD analizoi çështjen që do të gjykohet në Gjykatën e Apelit thuajse në të njëjtën orë me protestën e opozitës para Kryeministrisë, duke thënë se Enkelejd Alibeaj nuk duhet të ishte palë në këtë process, por u bë me urdhër të Ramës dhe ambasadores Yuri Kim.
“Kurrë në historinë e drejtësisë nuk ka ndodhur që një person, organizatë ose grup që nuk ka qenë palë në proces gjyqësor, të shpallet palë pas vendimit të gjykatës. Ka një rast, pa qenë palë, Lulzim Basha ka kërkuar përjashtimin e gjykatësit të faktit, kjo kërkesë i është dhënë një gjykatësi tjetër me mbiemrin Konstandini. Ai u ka kthyer përgjigje nuk legjetimoi në kërkesën tuaj se nuk jeni palë. Kjo është e vërteta. Ka një qëndrim të prerë, nuk legjitimoheni se nuk jeni palë në proces. Lulzim Basha, Enkelejd Alibeaj kishin të drejtë të hapnin gjyq veçmas në themel, për hesapë të tyre, të faktonin pretendimet e tyre, por jo të bëhen palë aty. Kostandini u tha që ju nuk jeni palë. Si u bë? Me urdhër të Edi Ramës dhe Yuri Kim”, sqaroi Berisha.
Më tej, kreu i selië blu u ndal te “sekserja” e shefit të qeverisë, duke thënë për Elira Kokonën se është një burokrate që duhej të ndodhej pas hekurave pasi ka realizuar tendera korruptivë me ministren Mirela Kumbaro.
“Ajo (Elira Kokona) është një nga njerëzit më problematikë, një nga korruptokratot që vendin duhet ta kishte në burg për tenderat që ka bërë me Kumbaron dhe jo vetëm, në disa institucione, por që mbahet si Plarent Ndreca, ju vjen edhe nëpër studio si analist…ka firmosur reduktimin me 1/3 të uniformave të policisë me të njëjtën faturë, janë paguar për 100 dhe kanë ardhur 60, paratë janë ndarë me të tjerët. Edhe Elira Kokona të njëjtën gjë bën“, nënvizoi ai.
Lideri demokrat gjithaashtu i dërgoi një mesazh KQZ-së duke thënë se duhet të regjistrojë PD-në në zgjedhje pasi vendimi i Gjykatës së Tiranës, i 25 marsit të kaluar, që njeh kongresin e 11 dhjetorit, është legjitim.
“Ne do futemi në zgjedhje. Këtë ne e konsiderojmë rrugë fitorjeve. Ne do ecim drejt fitores të sigurtë. Gjykata e Tiranës me vendimin e 25 marsit ka njohur legjitime PD-në kongresin e rithemelimit të saj në datën 11 dhjetor 2021 dhe në çdo vend të botës ky vendim është i regjistrueshëm 100% pa asnjë pengesë. Edi Rama ka urdhëruar mbi baza të tmerrshme korrupsionin, bllokimin e regjistrimit të vendimit“, u shpreh Berisha.
