Nga Boldnews.al
Dorën e Dan Hutrës nuk kishte kush ta ndalte ku për dy orë, në itinerarin e kobshëm Unazë e Re-Paskuqan, vrau tre gra dhe tre të tjera i plagosi rëndë. Herë duke zbrazuar armën kallashnikov e herë me ngulje thike, në kryeqytet u regjistrua një ngjarje mëse e kobshme. Kjo ishte tragjedia e shkruar me gjakun e gjashtë femrave të pafajshme ku tre dhanë shpirt dhe tre të tjera luftojnë ende për jetën. Krimi i rëndë sot është një statistikë ku edhe zëri i shoqatave të grave që “kujtohen për mort”, po shkon si qiri që tretet shpejt. Ajo që të trazon edhe më shumë se frika për pasigurinë e jëtës është mënyra e trajtimit të çështjes nga deputetët, kryeministri dhe ministrat e PS-së. ata kërkuan të mbahet një minutë heshtje në Parlament për tre viktimat gra. U çua dhe Çuçi që pa u mbushur minuti u ul sërish në karrigen e rëndë të Ministrit të Brendshëm, duke larë duart nga nga përgjegjësia.
Pasditen e djeshme Çuçi reagoi, por me një qëndrim amatoresk, ku vetëm moral dhe përgjegjësi nuk gjeje në asnjë rresht. “Përgëzime Policisë së Shtetit për arrestimin e një krimineli të regjur, që sot mori jetë të pafajshme në Kamëz. Një ngjarje e rëndë, që mund të ishte shmangur nëse autori do të ishte në burg nga sistemi i drejtësisë në të shkuarën për skendën e tij kriminale. Edhe njëherë Policia e Shtetit dëshmoi profesionalizëm dhe bëri detyrën duke çuar prapa hekurave autorin, që nuk duhet më kurrsesi t’i shpëtojë ndëshkimit më të ashpër të drejtësisë. Ngushëllime familjeve të viktimave!”, thuhej në reagimin e Çuçit.
Me fjalën: “Policia e Shtetit dëshmoi profesionalizëm”, Çuçi “vrau dy herë” familjarët e viktimave, sepse shumë prej tyre ngrenë pyetjen pa përgjigje institucionale: Ku ishte për dy orë policia që la të bridhte rrugëve të Tiranës një mosntër të rrezikshëm me armë në duar? Vetëm për profesionalizëm nuk mund të flitet. Vërtetë një kriminel i tillë me barrën e madhe të krimit të pengmarrjes, përdhunimit dhe vrasjes, asesi nuk duhet të ishte i lirë dhe kjo rëndon mbi drejtësinë, ama ka diçka që policia sot, sidomos drejtuesit e saj, bashkë me Çuçin ministër duhet të ndihen dyfish në faj.
Autori i kishte dhënë provat se përbënte rrezikshmëri të lartë, ndërsa ish-bashkëshortja e tij që ende dergjet në shtratin e spitalit kishte një “urdhër-mbrojtje” të lëshuar nga gjykata. Po kush e mbrojti atë? Policia e kishte për detyrë, por të paktën në një ditë të vetme në një ngjarje të rëndë si ajo e 1 marsit, strukturat e rendit në kryeqytet, veçanrisht komisariatet 5 dhe 6 nuk e justifikuan uniformën që mbajnë veshur.
Ministri i Bredshëm që dihet sesi e ka “përfituar” postin, për një ditë të paktën duhet të heshtë. Qëndrimit se arrestimi gjashtë orë pasi kishte lënë gjashtë gra të sulmuara qenka sukses i madh, në fakt është dështimi i rëndë moral, pikërisht morali duket se ka vdekur me kohë dhe është varrosur nga duart e Rilindjes që mban pushtet, por jo përgjegjësi.
