Nga Boldnews.al
Kryetari i Bashkisë së Tiranës, Erion Veliaj, ka filluar “pazar” edhe me të vdekurit. Afrimi i datës së zgjedhjeve e ka frikësuar, ndërsa institucioni që drejton po shpejton bërjen e tenderave. Dhe, pasi e “ndriti” me rrugët apo lagjet gjithë gropa, Lali Eri ka kthyer “sytë” edhe nga të vdekurit, duke tentuar që të bëjë ‘para’ edhe me tendera me procedura tepër të dyshimta.
Sipas dokumenteve që disponon BoldNews.al, Bashkia e Tiranës finalizoi tenderin me procedurë të hapur “zgjerimi i hapësirave të varresave publike Tufinë”. Një tender që ka të bëjë me territorin në ish-komunën e Dajtit, ku disa kohë më parë ka qenë deputet i zonës Xhemal Qefalia.
Madje, dikur Qefalia ka qenë edhe kryetar i komunës me të njëjtin emër, Dajti. Ndërkohë, në atë zonë vepron dhe operon firma “Dajti Park 2007”, e cila ka bërë kërdinë me tenderat e asaj zone.
Sipas dokumenteve që disponon redaksia jonë, para pak ditësh Bashkia e Tiranës shpalli fituesin e këtij tenderi. Fondi limit i kësaj procedure ishte 91.516.148 lekë pa TVSH, ose me TVSH rreth 1 milionë USD. “Burimi i financimit janë të ardhurat nga Bashkia e Tiranës për vitin 2022, të miratuara nga Këshilli Bashkiak” thuhet në këtë dokument. Pra kanë qenë para’ të mbetura stok, të cilave u ka dalë pronari 1 vit me vonëse, në vitin 2023. Por, le të vijojmë dhe të analizojmë këtë procedurë!
Në dokumente shkruhet se kohëzgjatja e kontratës është pesë muaj kalendarik duke nisur nga data e lidhjes së kontratës së sipërmarrjes për të njëjtin objekt. “Me anë të këtij njoftimi ju informojmë se, në këtë procedurë kanë marrë pjesë ofertuesit ‘L.T.E CONSTRUCTION’ me vlerë të ofertës 53.590.426 lekë pa TVSH. Firma ‘DAJTI PARK 2007’ ka pasur një vlerë 57.503.314 lekë pa TVSH” thuhet në këto dokumente, pra rreth 4 milionë lekë të rinj më shumë sesa oferta më e ulët.
Por, duke qenë se kemi të bëjmë me binomin Veliaj-Qefalia, fitues është shpallur oferta e renditur e dyta. Në këtë rast, dy zyrtarët e Partisë Socialiste kanë bërë “pazar” me të vdekurit, duke përfituar para’ edhe nga nga kjo procedurë.
Skema, ashtu si në tenderët e tjerë, është e njëjtë! Skualifiko ofertat më të ulëta për të shkuar te firma e preferuar, e cila në këtë rast ka qenë “Dajti Park 2007”.
Në dokumente shkruhet se firma që ofroi më pak, “L.T.E CONSTRUCTION” u skualifikua pasi s’ka punë të ngjashme. Megjithëse renditen një seri punimesh për rikonstruksione apo ndërtimesh, sërish kjo firmë u s’kualifikua për t’i hapur rrugën Qefalinjve për të fituar një tjetër tender, në zonën e tyre, kësaj herë në prag të zgjedhjeve lokale të 14 majit.
