Vdekjen pas dhunës barbare që u ushtrua në apartamentin ku jetonte në Tiranë, të vajzës keniane Joy Ayoko, Sali Berisha tha sot se PD do ta ndërkombëtarizojë si çështje për të treguar sesi policia dhe qeveria në Shqipëri mbrojnë vrasësit dhe kriminelët.
Në bashkëbisedimin e përjavshëm me gazetarët, Berisha i dërgoi një mesazh kryeministrit Edi Rama, duke thënë se ai do të mbajë përgjegjësi personale për dhunimin barbar të 22-vjeçares.
Berisha gjithashtu shtoi se autorët e ngjarjes që i shkaktuan dëmtime, të cilat ndikuan që Joy të ndërronte jetë pas rreth 7 muajsh në një spital në vendin e saj, gjenden në qeveri, ndërsa policia është urdhëruar të fshehë gjithçka.
“Krim-ministri, Edi Rama do mbajë përgjegjësi personale. Rastin e vajzës nga Kenia ne do ta bëjmë çështje ndërkombëtare. Ta dijë Edi Rama këtë, mos të fshehë në qeveri vrasësit, por të dalë sepse nuk mund të vriten njerëzit në atë mënyrë. Vrasësi fshihet nga qeveria dhe kjo është një gjë shumë e rëndë. Por merrem me këtë, jo pak, por qëndrim më kriminal se sa ka mbajtur policia dhe hetimi i kësaj vajze nuk mund të gjendet. Të gjitha janë bërë me porosi se vrasësi fshihet në qeveri”, tha Berisha.
