Partia Demokratike, e mbështetur nga Partia e Lirisë, ka thirrur shqiptarët sot në Bulevardin ‘Dëshmorët e Kombit’ në orën 12:00 për të protestuar kundër qeverisë ‘Rama’.
Mbi 2000 qytetarë, mbështetës e simpatizantë të opozitës janë nisur sot nga Kukësi në drejtim të Tiranës.
Grupet e protestuesve janë organizuar nga dega e PD Kukës duke vënë në dispozicion autobuz e furgona për transportin e tyre drejt kryeqytetit në protestën kombëtare të opozitës që mbahet në orën 12:00.
Shumë qytetarë të tjerë janë organizuar edhe me nisma private duke marë automjetet e tyre për të udhëtuar drejt Tiranës.
Në dy qytetet e tjera të qarkut Kukës, në Has e Tropojë nisja e protestuesve është bërë më herët për shkak të largësisë dhe janë afro 1700 protestues nga këto qytete, të cilët po udhëtojnë për t’iu bashkangjitur protestës.
Nga Shkodra janë nisur me mijëra protestues drejt kryeqytetit. Nënkryetari i PD në Shkodër, Qashif Hoxha ka thënë se nisja ka filluar që në orën 8 në mënyrë të organizuar dhe me makina private
“Të largojmë një ditë e më parë këtë qeveri. Arsyet për të protestuar janë të shumta. Nga Shkodra priten 2500 – 3000 protestues. Nisja ka filluar që në orën 8 në mënyrë të organizuar dhe me makina private. Skenari i protestës qëndron te lidershipi i PD në Tiranë. Protesta do jetë shumë më agresive se të tjerat. Jemi këtu për ti dalë zot vendit. Këtu vetëm do protestohet deri në dorëheqjen e Edi Ramës.”– tha Hoxha.
