Për kryetarin e Partisë Demokratike, Sali Berisha ambasadorët e SHBA dhe Britanisë së Madhe në Tiranë, Yuri Kim dhe Alastair King-Smith janë të korruptuar dhe “siamezë” të Charles McGonigal, që kanë pasur një strategji për të asgjësuar opozitën dhe për të larguar atë nga jeta politike në vend.
Këto akuza të forta në drejtim të diplomatëve që përfaqësojnë dy nga partnerët më të fuqishëm të Shqipërisë, Berisha i bëri në studion e emisionit “Debat”, ku ndër të tjera nënvizoi se ka edhe një skenar për forcimin e pushtetit të Edi Ramës.
“Kam me qindra fakte për këtë dhe unë jam sot këtu për t’u rikujtuar shqiptarëve se shpallja non-grata e Sali Berishës, të cilin e kam deklaruar si një vendim të bazuar në lobim korruptiv të Edi Ramës e Soros. Nuk besoj se ka shqiptar që nuk i di përpjekjet antikushtetuese e antiligjore, antidiplomatike të guvernatores Yuri Kim, njeriun që ajo donte kryetar opozite për të vendosur në kontroll të plotë opozitën e një vendi, e cila tani hesht. Kim hesht, sepse është sjellë si motër siameze me McGonigal, ashtu siç u korruptua McGonigal dhe u angazhua me fuqinë e postit të tij kundër opozitës po kështu u korruptua zonja Kim dhe u angazhua në luftë të turpshme dhe pa princip për të shkatërruar opozitën shqiptare. E kam denoncuar me kohë, po kështu u korruptua zonja Kim dhe u angazhua në luftë të turpshme për të shkatërruar opozitën shqiptare. Duke mos paraqitur dot shqiptsrëve dhe komunitetit ndërkombëtar qoftë edhe një provë të vetme, kur opozita ishte dhe është popullata më proamerikane, i tregoi barin, i bëhej thirrje për të mos votuar këtë apo atë. Kur emisarë vinin dhe thoshin se kishin dosje për t’ua sjellë”, tha Berisha.
Duke u ndalur te pagesa prej 225 mijë dollarë që është bërë nga ish-agjenti i SHIK Agron Neza për Mcgonigal, Berisha tha se faktet janë të pamohueshme dhe akti është korrupsion i mirëfilltë me urdhër të Edi Ramës.
“Mediat kanë denoncuar për vakancat e saj me qeveritarë dhe afër tyre, nuk mohohen këto dhe këto janë thënë publikisht disa herë. Nuk ka një Agron Nezë që të çojë paratë dhe të japë në restorant a parking, por korrupsioni ka qenë në forma të ndryshme. Kanë qenë veprime korruptive të mirëfillta që nuk shprehnin parimet e mëdha mbi të cilat është ndërtuar kushtetuta e SHBA. Pse hesht zonja tani? Ajo që u ka fol shqiptarëve detin e malet, për Enkelejdin e Lul Bashën, për Ramën e të gjithë ministrat me radhe, pse nuk u thotë një fjalë në këtë moment krize më të thellë pas ndërprerjes së marrëdhënieve diplomatike nga Enver Hoxha me SHBA. A ka një detyrim ajo? Ajo nuk kishte respekt për shqiptarët, ndiqte një agjendë që synonte shkatërrimin e opozitës dhe forcimin e pushtetit të Edi Ramës, më të korruptuar. Ajo është pjesë e këtij skenari”, theksoi kreu i PD.
Pjesë të këtij skenari Berisha bëri edhe ambasadorin britanik në Tiranë Alastair King-Smith që sipas tij ndan shumë gjëra me Erjon Veliajn dhe Lul Bashën për shkatërrimin e opozitës.
Sipas Berishës Kim dhe King-Smith nuk përfaqësojnë denjësisht vendet e tyre, por kanë vepruar për interesa okulte dhe personale.
“I njëjti skenar me Alastair King-Smith, i cili edhe këto ditë mbledh gazetarët duke i thënë si një aventurier ri dy shekujve me parë se kush duhet të jetë dhe kush nuk duhet të jetë në politikën shqiptare. Ai në fakt ndan shumë gjëra me Erion Veliajn dhe Lulzim Bashën. Ai është. Unë nuk kam interesa personale, por kam interesat e vendit tim, nuk pranoj që një ambasador të sillet këtu sikur kjo është një koloni e vendit të tij, ky është vend sovran. Unë garantoj se me qëndrimet e tij, me mbështetjen pa kusht qe i ka dhënë këtij regjimi, është një shkak, ndoshta jo kryesor por i përfillshim i vrasjes së shpresës dhe largimit të shqiptareve nga vendi i tyre”.
