Nga BoldNews.al
Disa vite më parë, shteti shqiptar i dha privatit një nga shërbimet më jetësore, hemodializën. Një firmë me origjinë të dyshimtë fitoi koncesionin e shumë debatuar. Më pas, nëpërmjet disa skemave, koncesionari është paguar për kontratën apo edhe për shërbime të pakryera. Në atë kohë, por edhe tani, Ministria e Shëndetësisë, nuk ka bërë të qartë se çfarë mbulon kontrata dhe a është dhënë i gjjthë ky shërbim! Nga hulumtimet e BoldNews.al rezulton se hemodializa vijon edhe në spitalet shtetërore, ndërkohë që është një firmë private që merr lekët. Pra, nga njëra anë propagandohet se është me koncesion dhe administrohet nga firma private dhe nga ana tjetër shteti vijon të bëjë tendera për këtë shërbim. Natyrisht, duke qenë jetësor për pacientët, qeveria duhet të bënte më shumë transparencë, të evidentonte se cili shërbim kryhet në privat dhe cili jo. Por, e gjitha kjo ka sjellë kaos, pasi për të njëjtin shërbim shteti bën tendera dhe po për të njëjtën “punë” i jep para’ privatit për ta kryer!
Sipas dokumenteve që disponon BoldNews.al, Qendra Spitalore Universitare “Nënë Tereza”, ka hapur tenderin e hapur mbi kufirin e lartë monetar me objekt “blerje materiale mjekësore për shërbimin e hemodializës në QSUNT” për 36-muaj. Bëhet fjalë për setin e seancave të trajtimit të hemodializës. “Vlera e pritshme e kontratatve që mund të lidhen gjatë marrëveshjes kuadër është 223.650.522 lekë” thuhet në dokumente.
Pra, nga njëra anë shërbimi jepet me koncesion dhe nga ana tjetër blihen sete për të njëjtin shërbim nga QSUT! Megjithatë, edhe Kontrolli i Lartë i Shtetit ks evidentuar mangësi me këtë koncesion, duke nënvizuar se janë paguar shërbime të pakryera duke rezultuar kështu me efekt financiar negativ që shkon në dhjetëra milionë lekë. “Kontrata koncensionare me nr.1503/44 prot., date 10.02.2016 ‘Për ofrimin e hemiodializës’ me shoqërinë ‘D..’ SHPK mundëson ofrimin e shërbimit të dializës në 5 rajone, me numër të projektuar të pacientëve për 156 seanca në vit (13 seanca në muaj) dhe 11,203 lekë çmimi për seancë hemodialize.
Nga auditimi ka rezultuar se nuk është realizuar numri i seancave të dializës sipas projeksionit mujor. Kjo ka sjellë si pasojë efekt financiar nga faturimet për shërbime të pakryera për seancat e dializës në vlerën 69,996,344 lekë” thuhet në raport. Më tej vijon se “nga të dhënat e vendosura në dispozicionkonstatohet gjithashtu se për 5 qendrat e hemodializës janë kryer 1,447 seanca dialize të faturuara mbi projeksionin e përcaktuar në kontratën koncesionare për ofrimin e shërbimit me efekt financiar për faturime për shërbime mbi projeksion me një çmim prej 11,203 lekësh llogaritet në shumën 16,210,741 lekë”.
