Nga Boldnews.al
Plumbat e qitura nga arma e efektivit Nevaldo Hajdaraj mbi 25-vjeçarin e pafajshëm Klodian Rasha më 8 dhjetor 2020, nuk ishte gjë tjetër përveçse derdhja e një kupe të mbushur me gjakun e qytetarëve që dhunoheshin kryesisht nga efektivë të repartit Shqiponja.
Sa kambale efektivësh të këtij reparti shkelnin mbi trupat e pambrojtur të qytetarëve që merrnin pjesë në protestat e opozitës? Ishin me qindra raste të denocuara që trupmëdhenjtë e shqiponjave testonin forcën e tyre mbi të pambrojturit, duke lënë pas terror dhe një militantizëm të rrezikshëm, teksa të shembnin në dru në momentin e shoqërimit, gjatë shoqërimit e deri kur i përplasnin në komisariate dhe më pas sërish me zell e vrap ktheheshin për të ushtruar të njëjtin sport: dhunën me “arsyen” se përse protestonin kundër Ramës.
Ata mbroheshin, e madje edhe respektoheshin nga kryepolici i kohës Ardi Veliu, që çuditërisht mbante “pseudonimin Kambalja”. Vrasja e Klodian Rashës i stepi për pak ditë, atëherë kur mijëra qytetarë të Tiranës, ku kryesisht të rinj dolën në protesta për jetën e tyre. Sot Hajdaraj është i dënuar për vrasjen e Rashës, por kolegët e tij që tentuan të mbulojnë krimin duke bërë sërish një krim as që janë prekur.
Po pjesë e këtij reparti më 8 dhjetor të vitit 2020 tentuan të mbulojnë vrasjen e kryer nga kolegu i tyre dhe hedhur një armë dy rrugica larg vendit ku Rasha dha frymën e fundit. U vertetua më vonë që i riu as që kishte lidhje me “revolverin karrem” që u servir nga mjeshtrit e propagandës për të krijuar mjergullën se vrasja nga polici kishte ndodhur si vetëmbrojtje.
Për shumë individë ky repart është kthyer në makth. Qytetarët ranë preh e dhunës së tyre nëse kapeshin në rrugë pas orarit të përcaktuar për shkak të pandemisë. Trembëdhjetë raste u denocuan nga qytetarët mbi dhunën policore. Ishte koha kur agresiviteti, terrori dhe dhuna përhapej në ajër nga “kulla në Surrel” në të gjithë vendin, ku vetë kryeministri postonte video me ushtrim dhunë nga forcat policore, duke e shitur si “ngjarje që ndodhte në Spanjën si vend anëtar i BE-së”, paçka se postimi i tij tregonte policë algjerianë që shtypnin qytetarë që protestonin kundër pushtetit të atjeshëm.
Jemi dy vite më pas dhe fatkeqësisht reparti Shqiponja është rikthyer po aq frikshëm në ushtrimin e terrorit psikologjik, dhunës fizike dhe shkeljes së ligjit, duke u bërë problem edhe për kolegët e tyre të strukturave të tjera në Policinë e Shtetit.
Janë të paktën shtatë raste ku efektivët e repartit shqiponja janë zbuluar në trafikun e drogës, prishjen e qetësisë publike madje edhe dhunë mbi efektivët e strukturave të tjera. Ashtu sikurse e pësoi një efektiv i qarkullimit rrugor që kolegu i shqiponjave i theu dhëmbët me shkelma e grushte vetëm për faktin se i kërkoi dukomentet e mjetit që drejtonte.
Po ashtu në raste të tjera janë përfshirë në trafikun e lëndëve narkotike duke përdorur pikërisht uniformën e policisë dhe siguruar para mbi paligjshmërinë. Po këtij reparti i mbeti në duar Lear Kurti i cili edhe pse shfaqi shenja të përkeqësimit të shëndetit nuk e dërguan në spital por me pranga në duar e përplasën në komisariat, deri në momentin që dha shpirt.
Po kush janë Shqiponjat në polici që detyrën e shohin si “skifterë” të pushtetit? Është vërtetë struktura më problematike në shkeljen e ligjit dhe mbi të gjitha në dhunën ndaj qytetarëve. Padyshim që në radhët e tyre ka me qindra efektivë që janë të ndershëm dhe nuk çedojnë në ushtrimin e detyrës, por fryma që ka ky grup tregon më së paku mungesën e përgatitjes psikologjike dhe sjelljes arrogante. Hasen kudo kur shihen në rrugë teksa bëjnë kontrolle automjetesh duke përdorur edhe filmime në momentin e ndërhyrjes, ndonëse është e ndaluar.
Ekspertët e policisë shprehen se shpesh janë edhe të patrajnuar sepse nuk ndjekin rregullat e duhura kur dhe si duhet të ngrejnë postblloqe. Konstatohen të futur nëpër rrugica dhe bëjnë sinjale me elektrik dore për të ndaluar automjetet që më pas u ushtrohet kontroll. Nuk kanë shenjat e vendosura në rrugë për ulje të shpejtësisë apo edhe tabelën e dukshme që duhet të vendoset në çdo postbllok ku shkruhet” “Ndal Policia”. Arroganca është moto e punës së tyre që zbret deri lart në majat qeverisëse aq sa edhe kolegët kur shohin Shqiponjat e kanë të qartë se nën atë uniform fshihet militantizmi partiak për pushtetin, miku i madh diku dhe koburja në brez që po zbrazet kaq lehtë mbi qytetarët.
Edhe pse është krijuar që në vitin 2000, njësia Shqiponja ne gjashtë vitet e fundit ngjan një strukturë që nuk ka asnjë përfërsi me njësite në vendet Europiane, madje për fatin e keq as nga reparttet e tjera brenda Policisë së Shtetit.
Drejtori i ri i Policisë së Tiranës Tonin Vocaj, por edhe kreu i Policisë së Shtetit Muhamet Rrumbullaku duhet të merren serizisht me këtë struktura e cila në disa raste vepron si “njësi paramilitare” në kundërshtim me çdo rregullore të policisë së shtetit dhe praktikave që ndiqen gjatë ushtrimit të detyrës. Muskujt, trysnia dhe dhuna për fatin e keq po u tregohet qytetarëve të pafajshëm, pasi shpesh krimi, kryesisht ai i trafikut të drogës, e ka gjetur “gjuhën e komunikimit” me ta.
