Nga Boldnews.al
Kryeministri Edi Rama po luan kartën shëndetësore para zgjedhjeve lokale të 14 majit.
Në fushatën e kaluar, Rama veproi me shpejtësi, duke “përdorur” Presidentin e Turqisë, Rexhep Erdogan, i cili ndërtoi për pak javë një spital në Fier. Spitali u inaugurua para zgjedhjeve të përgjithshme, ndërkohë pa kaluar disa vite nga ndërtimi, kanë nisur shqetësimet e para për mungesë medikamentesh apo edhe aparaturash. Por të dy, si Rama ashtu edhe Erdogani, nuk kishin në plan për spital, por për punë të tjera.
Në afërsi të atij spitali, që u komentua si “dhuratë turke”, po ndërtohet një aeroport apo edhe tuneli i Llogorasë, dy vepra të cilat kanë “dorë” edhe firmat turke, të lidhura direkt nga Erdogani. Pra, nga njëra anë ky spital u “shit” si bamirësi dhe nga ana tjetër, firmat e Erdoganit përfituan qindra miliona euro nga taksat e shqiptarëve.
Duket se kjo “lojë” do të përsëritet edhe në këto zgjedhje, pasi Rama po mendon të njëjtin skenar, kësaj herë për Spitalin Rajonal të Durrësit.
Disa ditë më parë, Spitali Rajonal i Durrësit, hapi një tender për akomodimin e disa personave të huaj. Sipas dokumenteve që disponon BoldNews.al, ky spital ka hapur procedurën tenderuese me objekt “shërbim për akomodimin e 2 menaxherëve turq” për Spitalin Rajonal Durrës.
Është një procedurë e hapur, e thjeshtuar, ndërsa ka si afat plot 12 muaj. Vlera e këtij tenderi është 3.115.129 pa TVSH, ndërsa tenderi do të bëhet në datën 6 shkurt 2023.
Por, siç edhe e lexuar, objekti është akomodimi i 2 menaxherëve turq.
Për çfarë do të vijnë në Shqipëri këta menaxherë? Çfarë po synon Rama me këtë tender? A do rikonstruktohet godina e Spitalit të Durrësit apo do të bëhet një spital i ri? Asnjë prej këtyre pyetjeve nuk gjejnë përgjigje në dokumentet e këtij tenderi, i cili është shumë i thatë. Madje, as në dokumente shoqëruese nuk përcaktohet se për çfarë do të vijnë!
BoldNews.al shfletoi edhe dokumentet shoqëruese, të firmosura nga Pamela Bardhaj, drejtoresha e Spitalit Rajonal të Durrësit, e cila njihet si një militante e thekur e partisë Socialiste.
Madje, emri i saj është lakuar edhe në dosjen “Tahiri”, pasi ajo ka pajisur me leje drejtimi mjetesh motorike ish-ministrin e Brendshëm.
Megjithatë, duke u ndalur te kjo procedurë, Bardhaj shkruan se “referuar e-mailit të MSHMS mbi afatin e qëndrimit të 2 menaxherëve turq, sipas të cilit afati i qëndrimit do të jetë jo më pak se 6 muaj. Si edhe e-mailit të nëndrejtorit ekonomik mbi miratimin e buxhetit për një afat 1 vjeçar, datë 13.01.2023”.
Pra, shkruhet mjaft qartë se direktivat kanë ardhur nga lart, nga ministrja e Shëndetësisë, Ogerta Manastirliu.
Duket se urdhri vetëm është zbatuar nga “patronazhistja” Bardhaj, e cila shkruan në dokumente se menjëherë “me marrjen dijeni të datës fikse të mbërritjes, do të lidhet kontrata, duke ndjekur procedurën e përcaktuar në LPP dhe RrPP, sipas kërkesave të AK”.
Të gjitha janë vënë në radhë për të pritur këta turq, “miq” të Ramës. Por, pa shpjeguar asnjë detaj se çfarë pune do të bëjnë këta turq!
