Nga Boldnews.al
Ish-Ministri i Financave, Shkëlqim Cani është zyrtari i parë i lartë që u mor në pyetje nga Struktura e Posaçme Kundër Korrupsionit, për një ankand të zhvilluar në vitin 2015 dhe të fituar nga biznesmeni Lirim Fezollari.
Në atë kohë, ish-ministri i Zhvillimit Ekonomik, Arben Ahmetaj, vendosi shitjen e pjesës më të madhe të aksioneve të qeverisë tek kompania shtetërore “Buka” sha nëpërmjet procedurës së ankandit.
Procedura u zhvillua nga Ministria e Financave, e cila në atë kohë drejtohej nga Shkëlqim Cani.
Ankandi u fitua nga shoqëria Lirim Fezollari, i cili më pas mori leje ndërtimi nga kryebashkiaku Erion Veliaj për ngritjen e objekteve për bizneset e tij në trojet e ish-ndërmarrjes “Buka” sh.a”, në zonën e “5 Majit” dhe “Ish-Qytetit të Nxënësve”, më konkretisht një qendër tregtare dhe një qendër lojërash për fëmijë, “Latitude”.
Por, të gjitha këto procedura janë kundërshtuar në rrugë gjyqësore nga trashëgimtarët e një familjeje të vjetër tiranase.
Përfaqësues të kësaj familjeje kanë shprehur edhe publikisht pretendimet e tyre, duke deklaruar se ata kishin të drejtën e parablerjes së trojeve të “Buka” sha, në rast se shteti do të vendoste t’i shiste.
Sipas përfaqësuesve të familjes trashëgimtare, Komisioni i Kthimit dhe Kompensimit të Pronave u ka njohur pronësinë në trojet e “Buka sha” në zonën e “5 Majit”, me një vendim të vitit 1994.
Por, kur në vitin 2015, qeveria vendosi të shesë pjesën më të madhe të aksioneve të saj tek “Buka” sha, familja trashëgimtare nuk u thirr për të marrë pjesë.
Ky duket se është pak a shumë thelbi i kallëzimit të depozituar në SPAK, ku ish-zyrtarët e lartë të qeverisë “Rama” akuzohen për shkelje të barazisë në tendera dhe shpërdorim detyre në favor të biznesmenit Lirim Fezollari.
Ankandi
Në 24 Korrik të vitit 2014, ministri Arben Ahmetaj urdhëron nisjen e procedurave për shitjen e aksioneve shtetërore tek ndërmarrja publike “Buka Sha.”, të cilat ishin 45.97 përqind të totalit.
Kompania publike zotëronte në atë kohë disa troje në Tiranë, përfshirë fabrikën kryesore ku prodhohej buka për Tiranën deri në fillim të viteve ’90, në zonën e ish-Qytetit të Nxënësve (aktualisht e njohur si rrotullimi i Pallatit me Shigjeta), si “furra elektrike”, e ndodhur në zonën e “5 Majit”.
Furra elektrike në zonën e “5 Majit” ishte ndërtuar në truallin e një familjeje tiranase, të cilës i ishte njohur e drejtat e kthimit dhe kompensimit të pronës nëpërmjet parablerjes, me një vendim të vitit 1994.
Por, në procedurat e ankandit të iniciuara nga Arben Ahmetaj dhe të zhvilluara nga Ministria e Financave nën drejtimin e Shkëlqim Canaj, duket se familja trashëgimtare nuk është thirrur në ankand.
Kjo dallohet qartësisht edhe në një dokument, “Akt-Marrëveshje” paraprake, të nënshkruar në 18 qershor 2015 ndërmjet Komisionit të Ankandit të Ministrisë së Financave dhe Lirim Fezollarit, i cili në atë kohë zotëronte aksione në kompaninë “Buka” sh.a”.
Procedura e ankandit finalizohet në 19 gusht 2015, ku Ministria e Financave njofton fituesin dhe Ministrinë e Zhvillimit Ekonomik për rezultatet e procedurës.
Aktualisht, në shoqërinë “Buka” sha, biznesmeni Lirim Fezollari zotëron 89.4 përqind të shoqërisë “Buka” sha”, Ministria e Ekonomisë 4.73%, ndërsa pjesa tjetër është e shpërndarë në mbi 100 aksionerë të vegjël.
