Kreu i KQZ-së, Ilirjan Celibashi ka zhvilluar këtë të premte një takim me ambasadorin e Britanisë së Madhe, Alastair King-Smith pak muaj para zgjedhjeve të 14 Majit.
Me anë të një postimi në FB, Celibashi ka zbuluar detaje nga takimi.
Celibashi shkruan se biseduan mbi përgjegjshmërinë dhe transparencën e KQZ Shqiperi, procesin e verifikimit të kandidatëve, shmangien e përfshirjes së burimeve shtetërore në zgjedhje, rolin e medias në procesin zgjedhor, mbrojtjen e administratës nga influencimi i votës, si edhe mbrojtjen e të dhënave të zgjedhësve.
“Zgjedhjet Vendore #14MAJ2023 në Shqipëri nën vëmendjen e duhur nga Mbretëria e Bashkuar. Me Ambasadorin e British Embassy Tirana – SHTZ Alastair King-Smith patëm një bisedë mjaft konstruktive me fokus tek përgatitjet e procesit zgjedhor të ardhshëm dhe rëndësinë e këtyre zgjedhjeve për vendin. Bashkëbiseduam mbi përgjegjshmërinë dhe transparencën e KQZ Shqiperi, procesin e verifikimit të kandidatëve, shmangien e përfshirjes së burimeve shtetërore në zgjedhje, rolin e medias në procesin zgjedhor, mbrojtjen e administratës nga influencimi i votës, si edhe mbrojtjen e të dhënave të zgjedhësve.
I theksova Ambasadorit King-Smith vijimin e propozimeve të KQZ ndaj Komisionit të Posaçëm Parlamentar të Reformës Zgjedhore. Gjithashtu e falenderova Ambasadorin Britanik dhe Qeverinë e tij për ndihmën e vazhdueshme ndaj KQZ dhe dedikimin e tij për rritjen e mbështetjes ndërkombëtare ndaj institucionit qendror të zgjedhjeve.”, shkruan Celibashi.
Ditën e sotme janë dërguar në KQZ emrat e anëtarëve dhe sekretarëve të KZAZ-ve për zgjedhjet e 14 majit nga ana e Partisë Demokratike dy ditë para përfundimit të afatit zyrtar.
Afati për dorëzimin e emrave mbaron ditën e diel në mbrëmje dhe ende pritet që të dorëzohet një listë me emra dhe nga grupi i Alibeajt.
Lista me emra e dorëzuar nga PD mban firmën e sekretarit të përgjithshëm të partisë, Flamur Noka.
