Kreu i Agjencisë Shtetërore të Kadastrës Artan Lame ka dalë sot në një konferencë për mediat për të njoftuar se nga e mërkuara pritet që të miratohet një VKM shumë e rëndësishme që do të ndihmojë në përditësimin e pronave publike.
Duke u ndalur te abuzimet ndër vite me procesin e regjistrimit të pronave, Lame iu referuar skandalit që lidhet me burgun e Shënkollit në Lezhë, oborrit të së cilit duket se i ka është shfaqur pronari.
“Është abuzuar me pronën shtetërorë. Për shkak të mos regjistrimeve. Rastet me abuzimin janë të pafundme dhe ka nisur për shkak të mos regjistrimit ndër vite të pronës shtetërore. E njëjta gjë ka ndodhur me Ministrinë e Shëndetësisë, Arsimit dhe jemi ndeshur me kronika se oborri i shkollës i është kthyer pronarit apo spitali. Burgut të Shënkollit në Lezhë, oborrit i ka dalë pronari. E kam ndeshur personalisht, qendra spitalore “Nënë Tereza” në Tiranë. Brenda saj ka pafund prona të kthyera të privatizuara, ka qene e pamundur të ndalohej si proces”, tha kreu i Kadastrës.
Në vijim ai shtoi se po lancohet sot regjistrimi i pronës shtetërore dhe në total janë identifikuar 260 mijë prona shtetërore ku një pjesë e madhe rezulton e paregjistruar.
“Në vitin 2020 qeveria prodhoi dy ligje të rëndësishme, u arrit të identifikohen 230 mijë prona shtetërore, sot kemi 260 mijë prona shtetërore në të gjithë territorin. Prej tyre 150 mijë i janë transferuar institucioneve vendore”, sqaroi ai.
Për të theksuar se deri ku arrijnë problematikat, Lame u ndal edhe te godina e Presidencës së Shqipërisë. Ai i bëri thirrje presidentit Bajram Begaj që të regjistrojnë godinën e Presidencës si pronë shtetërore.
“Presidenca nuk ka të regjistruar asnjë pronë të veten. Ligji 20/20 nuk u dekretua nga presidenti i republikës në atë kohë. Unë kam kërkuar të miratohet sepse do i hapë rrugë regjistrimit të pronës shtetërore. Presidenca rezulton edhe sot pa regjistruar. Presidenti i asaj kohe bëri një dalje duke thënë se ishin vjedhur pronat e presidencës, por ajo vjedhje është bërë sepse presidenca nuk ishte regjistruar. I bëj thirrje presidencës të aplikojë në E-Albania për të regjistruar pronën e tyre”, nënvizoi Lame.
