Kryetari i PD-së, Sali Berisha e akuzoi kryeministrin Edi Rama se po mban peng vendimin e çështjes gjyqësore për “vulën” e PD.
Në një deklaratë gjatë ceremonisë së 32-vjetorit të themelimit të degës së PD-së në Kurbin, Berisha tha se kjo nuk do pengojë PD-në për të përmbysur “monizmin e Edi Ramës”.
“Ky bastard mban në kundërshtimin më flagrant, primitiv të ligjit vendimin e gjykatës dhe mendon se do parandalojë fitoren e demokratëve në mbarë Shqipërinë. Të betohemi në flamur, para Zotit se gjë në botë s’do na pengojë për të përmbysur monizmin e Edi Ramës. Misioni është i shenjtë, liria është frymëzimi, fuqia, e gjitha energjia, dhe s’ka forcë në botë të na ndalojë”, u shpreh kreu i PD-së, i cili u bëri apel demokratëve për bashkim.
“Ndaj ju ftoj demokratë dhe demokrate të Kurbinit të bashkohemi në këtë mision të ri”, tha ai.
Berisha përmendi edhe emigrimin masiv të shqiptarëve, duke akuzuar Ramën për gjenocid.
“Po kryen gjenocid në kushtet e llogaritura që ata të largohen nga Shqipëria. Sigurisht po të vjedhjesh, ti vjedh të ardhshmen e tyre, po vodhe votën, vjedh shpresën e tyre”, tha Berisha.
Ndaj, shtoi ai, “misioni ynë për Shqipërinë është jetik”.
“Kam besimin më të thellë se më 14 Maj, kudo në Shqipëri do vulvitet flamuri i fitores, do përmbyset monizmi”, u shpreh.
