Në landifillin e Sharrës nuk bëhet diferencimi dhe riciklimi i mbetjeve ashtu siç ka pretenduar publikisht kryeministri Edi Rama dhe nuk ka incenerim siç parashikon kontrata e qeverisë me “Integrated Energy BV”. Plehrat e marra nga kazanët e mbetjeve groposen në tokë.
Këtë dëshmoi një video e publikuar nga Partia e Lirisë këtë të Martë, që ndoqi procesin sesi merreshin mbetjet nga kazanët e plehrave në kryeqytet, deri në groposjen e tyre në Sharrë.
Kryeministri Edi Rama ka pretenduar se në inceneratorin e Tiranës bëhet ndarja në burim, riciklimi dhe djegia.
Pamjet tregojnë Monika Kryemadhin e cila hedh në kontenierët e mbeturinave një qese fosforeshente me mbeturina të riciklueshme për të gjurmuar procesin e trajtimit të mbetjeve. Nga pamjet me dron nga gjurmimi i qeses fosforeshente kuptohet që në inceneratorin e Tiranës nuk kryhet asnjë proces qoftë nga ato që është zotuar kryeminstri Edi Rama në komision qoftë edhe nga deklarimet e përfaqësuesve të kompanisë. Sipas pamjeve me dron në inceneratorin e Tiranës, kryhet vetëm procesi i peshimit dhe groposjes së mbetjeve. Ndryshe nga sa parashikohet në kontratën për të cilin kompania paguhet 29 euro për ton dhe ato që pretendon kreu i qeverisë.
Krahasimi
Duke marrë shkas nga po nga deklaratat e kryeministrit në Komisionin Hetimor se “procesi në inceneratorin e Tiranës është ekselent dhe më i liri në rajon”, Kryemadhi paraqiti edhe një video me pamje që tregojnë procesin e punës në landfillin e Shkodrës.
Nga krahasimi i pamjeve del që Tirana nuk ka incenerator, por thjesht një qendër grumbullimi mbetjesh të njëjtë me atë të Shkodrës. Bashkia e Shkodrës për të njëjtin proces, pra atë të groposjes paguan 1600 lekë të reja për ton. “Ndërkohë Bashkia e Tiranës paguan 29 euro për ton duke na e shitur si proces incenerimi kur ndërkohë kryhet vetëm groposje, pa diferencim”, denoncoi Kryemadhi. Sipas PL-së, me këtë proces, shqiptarëve po u vidhen 15 euro për ton.
Në një konferencë për mediat, ajo paralajmëroi se pamjet do të depozitohen në SPAK dhe i bëri apel Prokurorisë së Posaçme të veprojë për këtë aferë. Ndryshe, shtoi, SPAK mund të cilësohet bashkëpunëtor.
