“Mos vidh. Hiqe dhomën e gjumit nga avioni personal”. Ky ishte apeli që kryetari i Partisë Demokratike, Sali Berisha i bëri kreut të qeverisë, Edi Rama.
Gjatë një fjalimi me rastin e 32-vjetorit të themelimit të PD në Durrës, Berisha ceku njoftimin e djeshëm të kryeministrit Rama lidhur me një “bonus” për pensionistët një muaj para zgjedhjeve lokale.
Berisha tha se kjo kategori nuk ka nevojë për mëshirë, ndërsa i bëri thirrje Ramës të mos vjedhë, në mënyrë që të rriten të ardhurat për qytetarët.
Kryedmeokrati solli në vëmendje edhe një episod mes Ramës dhe kryeministrit në detyrë të Malit të Zi Dritan Abazoviç, gjatë një aktiviteti dje në Tiranë, që nxjerr në pah hendekun mes pagës minimale në vendin fqinj dhe atë që është në fuqi në Shqipëri – 34 000 lekë.
“E dëgjoni këto ditë si bërtet Edi Rama për pensionistët. Do ketë një bonus të madh. Por në prill, kur t’ua marrë borgjezëve taksën e jashtëzakonshme, do lumturojë sërish pensionistët. Dje i tha në sy kryeministri i Malit të Zi, shqiptar edhe ai, se e rrita rrogën mesatare në katër vite nga 500 euro në 720 euro. Në nëntë vite jo vetëm nuk e rriti, por e uli me të paktën 35 përqind rrogën mesatare. Pensionistët nuk kanë nevojë për mëshirë. Mos vidh. Hiqe dhomën e gjumit nga avioni personal. Dhe do shohësh se do mbeten dhjetëra miliona euro. Mos vidh që zyrtarët e tu të mbushin dyshekët dhe tubat e aspirimit me paratë e shqiptarëve.
Çfarë ndodhi me vjedhjen e fundit? U përpoq prap që të fshihte, siç ka fshehur vjedhjen e Damianit, siç ka fshehur vjedhjet e ministrave të tjerë. Gjithçka bazohet në një përçmim ndaj qytetarëve. Gjithçka bazohet në vjedhjen e qytetarëve. Kjo që po bën kjo qeveri është absolutisht gjenocid ndaj shqiptarëve, në krijimin e kushteve të kalkulueshme për largimin nga vendi. Këtë cilëson një nga nenet e OKB për gjenocidin. A nuk janë kushte të kalkulueshme këto kur rrit çmimet në borde dhe jo me treg? Kur u vjedh nga xhepat qytetarëve u merr vetëm me çmime mbi gjysmë miliardë euro, dhe kur u thua se do i lumturojë se do t’ju shpërndajë 80 milionë, kurse 500 të tjera i shpërndan dhe i vjedh me klientelën e tij”, u shpreh Berisha.
Gjatë fjalës së tij, ai tha se jemi në një monizëm absolutisht më të fuqishëm se i vitit 199.
“Sot jemi në një monizëm, i cili ushtron mbi qytetarët shqiptarë të gjitha llojet e dhunës, përfshi edhe dhunën e teknologjive më moderne. Sot jemi në një monist që vret çdo ditë shpresën e të rinjve. Sot shqiptarët janë njerëzit më shpresë-vrarë, se e drejta nuk ekziston për ta, se ligji nuk ekziston, se pasuritë publike janë një mallkim, se fondet dhe taksat e tyre vidhen e vidhen. Se trajtohen në mënyrën më depersonalizuese”, u shpreh.
Ai shtoi se pavarësisht përpjekjeve të disa diplomatëve të korruptuar që “u vërsulën për të shkatërruar PD-në, sot jemi më të fortë se kurrë”.
Në fund, deklaroi se “jemi në një revolucion të dytë”, ndërsa bëri thirrje për bashkim për rrëzimin e Ramës nga pushteti.
“T’i lëmë ata që s’duan. Që kanë vënë veten në shërbim të Edi Ramës, të shkelmojnë mbi veten e tyre dhe mbi dinjitetin e tyre. Zgjedhje fatale”, u shpreh Berisha.
