Kryeministri Edi Rama njoftoi shpërndarjen e një “bonusi për pensionistët” vetëm një muaj para zgjedhjeve lokale të 14 Majit 2023.
Në një postim në faqen e tij në “FB” këtë të Premte, Rama shprehet se shuma monetare do të shpërndahet në mënyrë “që barra e inflacioni i luftës” për këtë kategori, “të vazhdojë të jetë sa më pak e ndjeshme”.
“Të gjithë pensionistët po marrin këto ditë sipas premtimit bonusin e Pakos së Madhe dhe urojmë ta kenë sa më të mbarë e me shëndet të plotë, vitin që sapo ka nisur. Me marrjen e këstit të parë të taksës së jashtëzakonshme mbi eksportuesit e energjisë në muajin prill, do të programojmë një tjetër bonus për pensionistët, që barra e inflacioni i luftës për ta të vazhdojë të jetë sa më pak e ndjeshme”, shkruhet në postimin e kreut të qeverisë në rrjetin social.
Siç e vë në dukje vetë Rama, ky “bonus” i ri vjen pas të ashtuquajturës “pako e madhe” – një shpërblim monetar që qeveria miratoi në Dhjetori për disa kategori qytetaresh, me një fond total 8 miliardë lekë.
Mes tyre ishin edhe pensionistët, shumë prej të cilëve, në deklaratat e dhëna për media, e cilësonin shumën që jepej nga qeveria të pamjaftueshme.
“Ҫfarë janë 5.000 lekë, asgjë s’janë. Nuk mjaftojnë. Një fatkeqësi… Me 5000 lekë… Edi Rama dhe shamitë që blen i ka më të shtrenjta. Ti vijë turp se s’kemi me ҫfarë të jetojmë… Të shkosh të blesh ilaҫet në farmaci shkojnë në 5000-6000 lekë”, ishin disa nga prononcimet e pensionistëve.
Në të njëjtën linjë ishte dhe opozita. Kreu i PD-së Sali Berisha e quajti “pakon e madhe” një “pilulë elektorale”.
“Është thjesht një pilulë elektorale me efekt jashtëzakonisht minimal, krahasuar me çmimet stratosferike me të cilat përballen pensionistët dhe ata që janë me rroga të ulëta”, do të shprehej Berisha gjatë një deklarate nga foltorja e Kuvendit.
Në disa vendime të tjera në Dhjetor, qeveria alokoi fonde prej 89 milionë euro për bashkitë, për “procesin e rindërtimi” nga tërmeti i vitit 2019-ës dhe investime publike, me ‘pjesën e luanit’ që i takoi Tiranës.
Shpërndarja e granteve individuale për zbutjen e pasojave të tërmetit ishte prezente edhe gjatë zgjedhjeve parlamentare të 2021-it duke ngritur pikëpyetje për mënyrën se si Partia Socialiste e përdor qeverisjen për të ndikuar tek vendimi i votuesve.
Në një analizë lidhur me çështjen, “BIRN” do të raportonte se aktivistët e shoqërisë civile e shohin shqetësuese këtë praktikë në prag të zgjedhjeve dhe i konsiderojnë fondet për bashkitë si një planifikim elektoral, jo të ndikuara nga interesat e publikut.
Opozita nga ana tjetër, shprehet se Rama ka nisur me “blerjen e votave” përmes këtyre praktikave.
Shqetësime këto që mesa duket kanë rënë në “veshin e shurdhët” të kryeministri Edi Rama, i cili po i shton të ashtuquajturat “pilula elektorale” para zgjedhje lokale.
