Detaje të reja zbardhen nga ngjarja në Shkodër, ku një nënë e re ka hedhur në lumë fëmijën.
Raportohet se 32-vjeçarja ishte e pamartuar dhe kishte dalë nga materniteti i Shkodrës në datën 4 Janar.
Foshnjës nuk i është regjistruar atësia. E reja e cila jetonte me dajën, sipas raportimeve mediatike, ka deklaruar te person të tjerë se fëmijën do ta hidhte në lumë, pasi nuk kishte ku ta linte.
Aktin e kreu mbrëmjen e djeshme. Trupi i pajetë i foshnjës i lindur më 30 Dhjetor, u gjet mëngjesin e kësaj të Shtunë.
32-vjeçarja Orjana Gremi u arrestua nën akuzën për veprën penale “Vrasja me dashje”.
Po ashtu, Gremi ka pranuar në komisariatin e policisë së Shkodrës se ka hedhur në lumin Kir të birin. Burime pranë policisë bëjnë me dije se 32-vjeçarja ka pranuar përgjegjësinë për ngjarjen duke thënë se nuk ka pasur mundësi ta mbante foshnjën.
