Lindja e një fëmijë për shumëkënd është një ndër gëzimet më të mëdha që mund të ofrojë jeta. Megjithatë, ajo që ka ndodhur në Shkodër mbrëmjen e së Premtes, i ngjan skenës më tronditëse të një filmi horror.
Siç njofton policia lokale, mbrëmjen e djeshme, një 32-vjeçare me banim në fshatin Myselim, ka hedhur në lumë foshnjën 7-ditëshe. I vogli nuk ka mundur të mbijetojë. Trupi i pajetë është gjetur mëngjesin e sotëm.
“Strukturat Hetimore të Drejtorisë Vendore të Policisë Shkodër, bazuar në inteligjencën informative, se mbrëmjen e djeshme, një shtetase dyshohet se kishte braktisur foshnjën e saj, të seksit mashkull, të lindur më datë 30 dhjetor 2022, dhe mund ta hidhte në lumin Kir, kanë organizuar punën për verifikimin e këtij informacioni të marrë.
Si rezultat i kontrolleve të ushtruara nga shërbimet e Policisë, gjatë mbrëmjes së djeshme dhe orëve të para të mëngjesit të sotëm, në vendin e quajtur Postribë, në lumin Kir, u gjet i pajetë, trupi i foshnjës së 32-vjeçares e cila e kishte hedhur atë në lumë gjatë natës”, thuhet në njoftimin paraprak të policisë lidhur me ngjarjen.
Ndërkohë, e ëma e të voglit, 32-vjeçarja Orjana Gremi, u arrestua nën akuzën për veprën penale “Vrasja me dashje”.
Burime pranë policisë bëjnë me dije se 32-vjeçarja ka pranuar përgjegjësinë për ngjarjen duke thënë se nuk ka pasur mundësi ta mbante foshnjën.
Kanë qenë misionaret e Kishës Katolike që kanë njoftuar dje policinë, pasi kanë parë që e reja nuk e ka pasur fëmijën me vete.
Lexo edhe:
- “Nuk kam ku ta lë”/ Çfarë deklaronte e reja që hodhi fëmijën në lumë
- Mjeku që asistoi lindjen e 32-vjeçares: Erdhi vetëm, tha që nuk e donte fëmijën
- Hodhi foshnjën në lumë, drejtori i Maternitetit: Nëna nuk kishte probleme mendore
