Policia ka arrestuar ish-drejtoreshën e Bashkisë së Tiranës, Viola Sterjo e cila akuzohet për veprën penale “Mashtrim”.
Uniformat blu bëjnë me dije se nga hetimet e kryera rezulton se në periudhën mars-nëntor 2020, nëpërmjet mashtrimit, ish-zyrtarja në Bashkinë e Tiranës Viola Sterjo, dyshohet se ka përfituar në qytetin e Korçës, një shumë të konsiderueshme monetare, me qëllim ndikimin e saj në institucione shtetërore, që qytetarë të ndryshëm të përfitonin fonde monetare nga shteti.
“Specialistët për Hetimin e Krimit Ekonomik-Financiar në DVP Korçë, në bashkëpunim me specialistët e Seksionit të Kërkimit në DVP Tiranë, bënë ekzekutimin e urdhrit të Prokurorisë për ndalimin e shtetases V. S., 39 vjeçe, banuese në Tiranë.
Ndalimi i saj u bë pasi, Gjykata e Shkallës së Parë Korçë, me vendimin e datës 26.12.2022, ka caktuar për këtë shtetase masën e sigurisë “Arrest në burg”, për veprën penale “Mashtrimi”, me pasoja të rënda”, thuhet në njoftimin e policisë.
Materialet i kaluan Prokurorisë pranë Gjykatës së Shkallës së Parë Korçë, për veprime të mëtejshme.
Ndikonte në institucione shtetërore, sa para përfitonte Viola Sterjo?
Sterjo akuzohet se në gjatë periudhës mars-nëntor 2020 ka përfituar përmes mashtrimit një shumë të konsiderueshme monetare, që fillon nga 20-90 mijë euro. Dyshohet se 39-vjeçarja mashtronte qytetarët se do të ndikonte në institucione shtetërore, që qytetarë të ndryshëm të përfitonin fonde monetare nga shteti. Arrestimi i saj vjen pas një vendimi që ka marrë Gjykata e Shkallës së Parë Korçë dy ditë më parë, që ka caktuar ndaj 39-vjeçares masën e sigurisë “Arrest në burg” për veprën penale “Mashtrimi”.
