Kryetari i Partisë së Lirisë, Ilir Meta ka komentuar zgjedhjet e ardhshme lokale të 14 majit 2023.
Në një intervistë në RTSH, Meta u shpreh me bindje se opozita do të dalë e fituar nga klëto zgjedhje të cilat i cilësoi si një test të mirë për demokracinë në vendin tonë.
“Kërkesa për largimin e qeverisë është një kërkesë e përditshme dhe së cilës i ka kaluar koha, qeveria duhej larguar prej kohësh pasi qëndron në pushtet në mënyrë jolegjitime, dhe tjetërsimit të votës. Ndërkohë 14 maji është një datë që s’mund të shtyhet dhe ky është lajm i mirë për çdo zhvillim. Përpara 14 majit do ishte i mirëpritur dhe kërkon angazhimin e opozitës për të ecur përpara në prioritetin për largimin e qeverisë. 14 maji do jetë test i rëndësishëm për demokracinë tonë, për opozitën”, tha Meta.
Ai u ndal edhe te situata brenda Partisë Demokratike, pasi Meta i cilësoi përplasjet të stisura nga Edi Rama.
“Këto janë teknikalitete të parëndësishme përballë energjisë në rritje të këtij koalicioni opozitar. Në këto zgjedhje qytetarët duhet të kenë 2 fletë votimi, për kandidatin dhe fleta për të zgjedhur partinë për çështjen e këshillave. E para është e zgjidhur, në Tiranë Belind Këlliçi, në Durrës Igli Cara dhe në Elbasan Luçiano Boçin, që janë 3 personalitete dhe super kandidatë për gjithëpërfshirjen që do sjellin për komunitetin.
Metamorfoca e PD ka marrë fund që në 11 nëntor të vitit të kaluar dhe tashmë i është rikthyer misionit për të cilin ka nevojë shoqëria dhe është forca kryesore sot e opozitës. Një forcë shumë e fuqishme e cila pa diskutim në bashkëpunim me PR dhe forcat e tjera politike opozitare të vërteta do arrijë një sukses të padiskutueshëm në zgjedhjet e 14 majit. Janë probleme të stisura nga Rama që qeverisjen e tij e ka bazuar te përpjekja për të korruptuar politikanë të opozitës dhe përçarë opozitën sa të jetë e mundur. Ky është investim i qartë për gjithë opinionin publik. Kjo është një politikë destruktive dhe e dalë boje e partisë e cila do jetë pothuaj zero. Ne do bëjmë përpjekje për unifikim të plotë të elementëve opozitarë që duan ndryshim”, u shpreh Kreu i Partisë së Lirisë.
