Dita e sotme ka nisur me tensione dhe përplasje mes policisë dhe banorëve pranë shkollës “Petro Nini” në Tiranë. Autoritetet kanë nisur punën për të shembur pallatin në rrugën ‘Margarita Tutulani’. Shkak është bërë pasi ndërtesa rezulton pronë e shtetit.
Si rrjedhojë, disa banorë janë mbledhur pranë banesave të tyre dhe po kundërshtojnë këtë vendim. Më herët banorëve të pallatit nr 15 u është komunikuar se pallati është dëmtuar nga tërmeti dhe duhej të shembej.
Pallati rezulton si pronë e shtetit pasi është ndërtuar që prej periudhës së regjimit italian në Shqipëri më 1941. Që prej vitit 1980, banorët u futën në këtë godinë me një kontratë ku paguanin një kuotë qiraje mujore, por kjo godinë kaloi si pronë e shtetit falë një ndryshimi të një VKM në vitin 2013.
Por duket se banorët nuk janë aspak dakord me këtë vendim që ka çuar në përplasje me uniformat blu.
Ata pretendojnë se Bashkia nuk u njeh dokumentacionet mbi pronësinë dhe se nuk kanë asnhë informacion mbi atë që i pret nëse dalin nga shtëpitë.
“Ne kemi dokumentet që në vitin ’45. Kjo është tokë e italianit, kanë qenë të italianit këto. Ne kërkojmë që të mbarojë gjyqi. Një vit më parë e nxorën DS5, pallati ishte mirë. Ishte në parametra më të mira se një pallat i sapo ndërtuar. E rrëzoi bashkinë dhe institutin që kishte bërë ekspertizën. Na kanë thënë dilni jashtë, edhe rusi në Ukrainë nuk i trajton njerëzit kështu. Jemi shumë të indinjuar. Të dy djemtë m’i kanë marrë në polici sot. Dilni jashtë thonë, vetëm kaq, pa asnjë argument,”- thotë një nga banorët.
Lexo edhe:
VIDEO/“Të pamëshirshëm në prag festash”, banori: Policia po na nxjerr jashtë
