Nga Boldnews.al
Në shumë rrugë dhe rrugica e kryeqytetit shihen kudo makineri që hapin kanale, shtrojnë ndonjë pllakë dhe mbulojnë me zift dhe asfalt gropëza në rrugë. Është një urdhër i hershëm që funksionon si “sahat zviceran” që në prag të zgjedhjeve lokale të hidhet asfalti i fushatës, për të zënë sytë e qytetarëve në këmbim të votës.
Është tipike si pllakat e rrugës “Myslym Shyri” që në tetë vite qeverisje të kryebashkiakut Veliaj nuk zenë vend, por arnohen herë pas here për të mbjellë më shumë propagandë se punë konkrete. Çdo kapak pusete i ri, apo edhe i vjetër që shkulet dhe rivendoset si i ri, duhet të ketë patjetër kamerat e bashkisë për të mbytur më pas median dhe publikun me propagandën se në kryeqytet po punohet.
Zyrës së propagandës i është dhënë urdhër që të dërgohet në çdo media vizive, të shkruar apo portale aktivitetet që bën kryetari i Bashkisë, në takime kryesisht me anëtarë të PS-së në njësi të ndryshme në Tiranë. Të paktën 30 minuta duhet që televizionet e joshura me leje ndërtimi apo reklama të japin pa asnjë prerje fjalimin e gjatë, malinj dhe përçarës të Veliajt, i cili që tani ka shtrirë ushtrinë e tij në kërkim të votave.
Perversiteti politik në mbulimin e zullumeve nuk ka fund. Burime të Boldnews.al shprehen se prej një jave Policisë Bashkiake Tiranë i është kërkuar që ta frenojnë pak dorën në gjoba ndaj automjeteve të parkuara. Kjo “këshillë” ka ardhur pasi shumë qytetarë ankohen për gjoba të padrejta dhe të shpeshta që vendosen nga policët bashkiakë, që në muajt në vazhdim do të shtohen edhe më shumë në numër në avazin e vjetër të punësimeve elektorale për të shtuar votat me çdo kusht.
Sondazhet e brendshme brenda PS-së flasin për një popullaritet gjithnjë e në ulje të Veliajt, për shumë arsye, ku më kryesorja është konsumimi tetë vjeçar në krye të bashkisë, por edhe kthimin e Tiranës në një qytet thuajse të pabanueshëm për shkak të ndërtimeve të shumta të pallateve dhe kullave.
Tirana është kryeqyteti me ajrin më të ndotur në Evropë dhe për këtë Veliaj ka të drejtë të marrë çdo çmim që mund të jepet për zhulin dhe sëmundjet ndaj qytetarëve, kryesisht në rrugët respiratore. Ai kërkon edhe një mandat të tretë, duke pasur si hije mbi kokë çështjen e inceneratorit të Tiranës që nëse do kishte “drejtësi të pavarur” Veliaj duhet të kishte kaluar disa herë pragon e SPAK dhe më pas një prag ngaku kërkon kohë të dalësh dhe rifitosh lirinë.
Edhe këtë mandat kërkon ta mbajë nëpërmjet propagandës së vazhdueshme, sulmet mbi kundërshtarët politik dhe mbi të gjitha me ziftin që hidhet në rrugët e kryeqytetit, për të mbuluar aferat dhe pastrimin e parave të trafiqeve në kullat që lartësohen çdo ditë.
