Gazetari Bledian Koka u shpreh se sjellja e Erion Veliajt në seancën e sotme tregon qartë “sjelljen e një njeriu nën diktaturë”, që nuk guxon të flasë lirisht dhe që, sipas tij, e di se “gropën ia ka hapur Rama dhe po e mbulon po ai”.
Në Syri Tv, Koka analizoi mesazhet e fundit të Veliajt nga burgu, duke theksuar se ato pasqyrojnë përpjekjen e tij për të negociuar fatin juridik, ndërsa fati politik, sipas gazetarit, “është tashmë i vulosur”.
Pjesë nga deklarata:
Ai bëri mesazhe. Në një analizë, sjellja e Veliajt sot është sjellja e një njeriu nën diktaturë, sjellja e një njeriu që nuk guxon të flasë pa “qime në gjuhë” dhe kur e di fare mirë që gropën ia ka hapur Rama, e ka futur dhe po e mbulon ai aty. Në këtë pikë, ai po mundohet të kapë ç’të kapë, sepse e di që fatin politik e ka të vulosur. Ai po negocion për fatin e tij juridik, i cili edhe ky ka dritëhijet e veta, sepse po flasim për një njeri për të cilin fati politik është halli më i vogël. Po flasim për një njeri që, nëse i konfirmohen akuzat, rrezikon nga 7 deri në 15 vite burg. Nuk është shaka për atë.
Ajo që duhet të lexojmë nga mesazhet e tij është se po mundohej të thoshte diçka që nuk ia mbante ta thoshte, aq më tepër që është në burg, dhe duhet të negociojë fatin e tij, të familjarëve të tij, të bizneseve të tij. Këtu njerëzit janë futur në burg për Ramën dhe nën mëshirën e Ramës kanë rifilluar jetën. Është shumë e gjatë, por në thelb është se këta po hanë kokat e veta. E vetmja “kokë” që duhet të “hahet” është se duhet të ndryshojnë narrativat.
Belinda Balluku është ajo që është, por nga sot praktikisht nuk është asgjë. E kam këtë bindje, sepse besoj fort që ajo që po ndodh me Ballukun është vokacion i Ramës dhe jo i SPAK-ut. Rama po trajton popullin shqiptar fiks siç e trajtonte Enver Hoxha dikur me “bar” dhe me gjyqe politike e publike. Dhe kjo nuk duhet të lejohet. Ky është një sistem i rrezikshëm për opozitën dhe për popullin shqiptar.
