Pas më shumë se 7 orësh shqyrtim, Gjykata Kushtetuese ka përfunduar seancën e jashtëzakonshme për vlefshmërinë e shkarkimit të Erion Veliaj.
Shkarkimi ishte vendosur më parë nga Këshilli Bashkiak, miratuar nga qeveria dhe formalizuar me dekretin presidencial.
Pas mbarimit të seancës, Veliaj është rikthyer në qelinë ku mbahet. Vendimi i Gjykatës Kushtetuese përfundimtar ende nuk është shpallur, ndërsa çështja do të ndjekë procedurat ligjore të mëtejshme.
Gjatë fjalës së tij, Veliaj tha se shkarkimi ishte politik dhe se u tradhtua nga njerëzit më afër: “Goditja më e rëndë më erdhi nga të mitë. Ata që më njohin më mirë, nuk më mbrojtën.” Ai shtoi se nuk kishte kryer asnjë shkelje për t’u larguar nga detyra:
“Kur beson që ke dhënë gjithçka për këtë mandate të qytetarëve, vjen arsyeja për të cilën të largojnë nga detyra. Dhe citoj ‘mosprezenca në detyrë për më shumë se tre muaj’. Nuk kishin se sit ë më fyenin më rëndë sesa kaq. Ka qenë fyerja më e rëndë e jetës time publike dhe këtë e thotë dikush që ka dëgjuar fyerje dhe legjenda urbane pa fund. Por kjo është fyerja më e rëndë sepse erdhi nga bashkëpunëtorët e mi, nga njerëz që më njohin më mirë se çdokush tjetër. Dhe që nuk denjuan as të më ftonin, as të më njoftonin dhe as të më dëgjonin. Zoti i faltë. Lutem çdo natë për ta dhe them Zot fali se nuk dinë ç’kanë bërë me atë vendim. Ata kanë qenë prezentë të rrëmbimit tim nga burgu. Djalin tim unë e kam takuar më shumë në burg sesa në liri”, tha mes të tjerash Veliaj.
Veliaj kërkoi që gjykata të mbrojë Kushtetutën dhe demokracinë, ndërsa theksoi se ndodhet i izoluar padrejtësisht.
Nga ana tjetër, gjatë seancës, Ilir Rusmali, këshilltar i Presidencës, mbajti fjalën e tij përpara trupës gjykuese. Ai theksoi se Kushtetuesja nuk mund të marrë vendim për shkarkimin, pasi kjo ndodhet jashtë kompetencave të saj. Rusmali argumentoi se gjykata duhet të ruajë mekanizmat mbrojtës dhe të mos shkelë kufijtë kushtetues të kompetencës:
“Si përfaqësues të Presidentit, pretendimi ynë është që dekreti i Presidentit për shpalljen e zgjedhjeve të pjesshme për bashkinë Tiranë ka qenë kushtetues më datë 1 tetor dhe ngelet i tillë edhe sot. Gjykata nuk mund të vendosë fatin e një akti administrativ kur Kushtetuta nuk e lejon këtë. Kompetenca për shqyrtimin e akteve administrative nga Gjykata Kushtetuese është e kufizuar dhe nuk përfshin dekretet e Presidentit jashtë rasteve të parashikuara nga Kushtetuta,” tha Rusmali.
Ndërkohë, përfaqësuesja e Këshillit të Ministrave, Irma Qosja, tha se shkarkimi nuk është kryer për shkelje kushtetuese, por për shkelje ligjorekonkretisht mungesën e paraqitjes në detyrë sipas nenit 62 të ligjit për vetëqeverisjen vendore.
