Zgjedhja e Altin Dumanit në krye të SPAK nuk ishte aq e lehtë sa mund të ishte menduar në fillim nga amerikanët që e mbështetën fort kandidaturën e tij.
Procesi ishte aq delikat dhe “beteja” për votat e 11 anëtarëve të KLP-së aq e ashpër, sa ambasadores së SHBA Yuri Kim iu desh të shkonte vetë në godinën e “Pallatit të Drejtësisë” për të përçuar një mesazh të qartë në përfundim të prezantimit të kandidaturës nga Edvin Kondili (i preferuari i qeverisë).
I gjithë procesi çoi edhe në krisje të marrëdhënieve mes Yuri Kim dhe Edi Ramës, duke tërhequr kështu vëmendje të pazakontë nga opinioni publik.
E tashmë që shefi i ri i Prokurorisë së Posaçme u zgjodh, procesi është komentuar me nota ironike nga deputeti i Partisë Demokratike, Luçiano Boçi.
Kreu i Grupit Parlamentar të PD, duke e krahasuar betejën për SPAK mes Kim dhe Ramës me finale e Kupës së Botës, thekson se nga kjo vorbullë tensionesh mësuam se drejtësia na është kthyer në trofe dhe jo drejtësi.
“Na u bë beteja për SPAK, sikur të ishte finalja e Kampionatit Botëror të Futbollit. Me tifozeri, me deklarata, me tymuese. Drejtësia na paska qenë trofe, jo drejtësi! Argjentinë-Francë po na ngjan si shaka!”, ironizoi Boçi.
