Kandidati i koalicionit opozitar “Bashkë Fitojmë” për bashkinë e Elbasanit në zgjedhjet e 14 Majit, Luçiano Boçi paraqiti sot në studion e emisionit “Debat”, platformën e tij për drejtimin e qytetit duke renditur një sërë projektesh në infrastrukturë dhe investimet për të rinjtë si jetike për të ardhmen.
Por pavarësisht prezencës së Boçit në studion, emisioni në A2CNN për mbrëmjen e sotme ishte programuar ndryshe, me planin që ishte për t’i dhënë hapësirë jo vetëm kandidatit të opozitës por edhe kryebashkiakut socialist Gledian Llatja për të debatuar mbi projektet e tyre për bashkinë.
Por, kandidati i Edi Ramës për bashkinë e Elbasanit ka refuzuar debatin televiziv me Luçiano Boçin ashtu siç edhe ka bërë me thirrjet e këtij të fundit për të prezantuar alternativat e tyre për drejtimin e qytetit edhe në një shesh para qytetarëve.
Fakti që Llatja nuk e mori guximin të ulej në karrigen përballë tij, ka bërë që Boçi të reagojë përmes një postimi në rrjetet sociale duke e quajtur qëndrimin e kryebashkiakut socialist si sjellje burracake.
Sipas kandidatit opozitar kjo lloj sjellje e atyre që udhëheqin pushtetin lokal tregon varfëri idesh dhe projektesh, por gjithashtu mungesë guximi për të marrë përsipër përgjegjësi siç është drejtimi i një qyteti.
“Eshtë keqardhje e madhe të shohësh kandidatë që pretendojnë poste dhe nuk kanë as guxim, as dinjitet për t’u ballafaquar në një debat të drejtpërdrejtë pse e duan atë post dhe çfarë vlerash mbrojnë. E vërteta është se kjo sjellje burracake i humb vlerën diskutimit të hapur publik, varfëron publikun në aspektin informativ, ndërsa provon jashtë çdo dyshimi se kandidatë të tillë nuk kanë as ide, as formim, as projekt dhe as guxim për të pranuar pozitat e tyre inferiore. Llogaridhënies nuk i shmanget dot askush!”, shkruan Boçi në Facebook.
