Vetëm ditë na ndajnë nga e diela e 14 Majit, kur shqiptarët me votë do të zgjedhin 61 kryebashkiakët e rinj të vendit dhe gara është intensifikuar me sulme mes kandidatëve dhe prezantime deri në detaje të programeve.
Një ndër bashkitë më të luftuara pritet të jetë Elbasani, me kandidatin e kalocionit opozitar “Bashkë Fitojmë”, Luçiano Boçi që synon të thyejë hegjemoninë e së majtës.
Boçi duke iu referuar garës me Gledian Llatjan ka zbuluar mbrëmjen e sotme se në Elbasan dy banda kryesore po mbledhin vota si “kokrra gruri” dhe ato janë qeveria e bashkia.
Në fjalën e tij gjatë emisionit “Ora e Betiti”, Boçi tha se opozita ëshë përballë një bande të strukturuar që mban të veshur kostumin e shtetit dhe nuk e sheh garën e 14 Majit si ballafaqim alterntaivash dhe programesh mes rivalëve.
“Në Elbasan ka banda. Banda kryesore është ajo e qeverisë dhe banda tjetër që është vazhdim i saj është banda e bashkisë. Drejtorët shkelin ligjin zgjedhor, organizohen në forma të tilla për të stimuluar rrëmbimin e votës, për ta kërkuar me metoda parapolitike atëherë jemi para një bande të strukturuar por që ka kostumin e shtetit. Janë grabites votash, fondesh, grabitës të së ardhmes që nuk përdorin maska por karriget e pushtetit për ti marrë. Është bërë normalitet që dikush që punon në shtet do të bëjë vota, dikush që është drejtor do bëjë vota, dikush që është mësues do të bëjë vota. Votat nuk janë kokrra misri por shprehje besimi ndaj politikave të caktuara që duhet të ndikojnë në ndryshimin dhe përmirësimin e jetës”, – tha Luçiano Boçi.
