Kryetari i Partisë Demokratike, Sali Berisha ka hedhur akuza të forta në drejtim të kryeministrit Edi Rama në kuadër të zgjedhjes së kreut të ri të SPAK-ut.
Gjatë një deklarate për mediat nga selia blu, Berisha thotë se Edi Rama ka ndërhyrë në këtë proces pasi do të mbrohet për aferën e inceneratorëve dhe kjo për Berishën është një akt i paprecedentë që ndodh në Shqipëri. Sipas Berishës, SPAK-u është kthyer në vegël të Ramës dhe të Taulant Ballës.
“Ç’punë ka një Kryeministër se kush emërohet në krye të SPAK, Ka vetëm dosjen e tij, sepse dosja e djegësve është dosje e organizatës kriminale, në të cilën ka firmosur Edi Rama dhe prandaj bën këtë figurë të të turpshme dhe e asgjëson totalisht këtë organ. Beteja është surrealiste, është paimagjinueshme, nuk ndosh kurrë. Bota e Krimit darkon prej 2 muajsh rresht me eksponentë të krimit të organizuar që janë në Parlament, ky është asgjësimi total i sistemit të drejtësisë, kurrë s’ka ndodhur më parë. Ky është SKAP-i i PS. SPAK merret si me qenë reparti i turpshëm i Edi Ramës dhe i Taulant Ballës”, tha Berisha.
Kujtojmë që ditët e fundit ka pasur një përplasje në distancë mes ambasadores amerikane Yuri Kim dhe kryeministrit Edi Rama i cili ka tentuar të ndërhyjë në zgjedhjen e kreut të ri të SPAK-ut.
