Inspektorati Kombëtar i Mbrojtjes së Territorit ditën e sotme ka zbarkuar sërish në bregdetin e Golemit.
IKMT njofton se ka nisur prishjen e një tjetër pishine në brezin bregdetar me pretendimin se është ndërtuar pa leje në pronësi të Kastratit.
“IKMT tjetër aksion në bregdetin e Golemit, prish strukturat e Hotel “Kastrati Empire”. Inspektorati Kombëtar i Mbrojtjes së Territorit ka nisur sot prishjen e një tjetër strukture betoni në brezin bregdetar të Golemit. Objekti “pishinë” dhe të tjera ndërtime shoqëruese pranë detit dhe brenda tij, i përkasin Hotel Kastrati Empire. Inspektorati Kombëtar i Mbrojtjes së Territorit nuk do të bëjë asnjë tolerim për çdo ndërtim që shkel ligjin dhe cënon infrastrukturën bregdetare turistike që u përket të gjithë shqiptarëve”, thuhet në njoftimin e IKMT.
Vetëm pak ditë më parë, IKMT prishi “Prestige Resort”, ndërsa pronarët pretendonin se gjithçka ishte ndërtuar me leje madje me “bekimin” dhe firmën e kryeministrit Edi Rama. Irfan Hysenbelliu e ka konsideruar si një hakmarrje të Edi Ramës pasi mediat në pronësi të tij kohët e fundit po mbanin linjë editoriale kritike ndaj qeverisë.
Edi Rama shpesh herë është kritikuar për “presionin” që ushtron ndaj mediave duke cënuar lirinë e tyre të cilat vazhdimisht publikojnë skandalet dhe aferat korruptive të qeverisë.
