Në të njëjtën ditë kur me lejet e dhëna nga Këshilli i Rregullimit të Territorit, Edi Rama i ka çelur dritën jeshile për të ngritur kulla në Tiranë e resorte në Dhërmi e Palasë, bosëve të ndërtimit të lidhur me qeverinë, kryeministri ka gjetur guximin që të dalë e të bëjë dhe propagandë kundër ndërtimeve pa leje.
Teksa IKMT e Dallëndyshe Bicit pas “Prestige Resort” po vazhdon sot aksionin po në Golem duke prishur një pishinë dhe godina që i përkasin “Kastrati Group”, KRRT nën drejtimin e Ramës ka miratuar rreth 20 leje ndërtimi e zhvillimi me përfitues oligarkë pranë qeverisë si Samir Mane, Shkëlqim Fusha, Lul Morina, Papuli, Bashkim Ulaj dhe familjarët e Sandër Frangajt.
Por të parin e qeverisë nuk e tremb aspak gjykimi i opinionit publik për standardet e dyfishta me të cilat vepron e shprehet qeveria e tij, pasi me një cicërimë në Twitter është trimëruar përballë Shoqatës së Ndërtuesve.
Rama i kërcënon ndërtuesit, duke thënë se po të duan mund të shkojnë edhe në Hagë, apo në Hënë, por kurrsesi ai nuk do të tërhiqet nga shembja e ndërtimeve pa leje.
“Shoqata e Ndërtuesve qenka ankuar në Gjykatën Kushtetuese pse po goditen rëndë pallatet me shkelje të lejeve të ndërtimit Le të shkojnë edhe në Hagë ose në hënë po të duan, po pallatet me shkelje do prishen ose do konfiskohen për interes publik prandaj uroj që GJK të mos lajthisë!”, ka shkruar sot Rama.
Shoqata e Ndërtuesve qenka ankuar në Gjykatën Kushtetuese pse po goditen rëndë pallatet me shkelje të lejeve të ndërtimit!Le të shkojnë edhe në Hagë ose në hënë po të duan,po pallatet me shkelje do prishen ose do konfiskohen për interes publik prandaj uroj që GJK të mos lajthisë!
— Edi Rama (@ediramaal) December 15, 2022
Por nisma për të cilën Kryeministri “betohet e stërbetohet” sot se do godasë me dorë të hekurt ndërtimet pa leje, deri tani ka rezultuar të jetë selektive dhe e kompromentuar nga pazaret e tij me klientët e rrethit të ngushtë.
Këtë e vërteton më së miri rasti i biznesmenit Lul Morina, të cilit i janë bllokuar në Tiranë 4 pallate pa leje.
Për sekuestrimin e tyre shkuan me regji televizive nga pas, dora vetë ministrat Bledi Çuçi dhe Belinda Balluku, por në krahun tjetër kryeministri i ka bërë sot dhuratë Morinës një leje për resort në Himarë.
“Leje Zhvillimi për objektin: “Kompleks elitar hoteleri dhe shërbime “In The Wild”, me vendndodhje në Dhërmi, Bashkia Himarë”, me subjekt zhvillues shoqërinë “Xheluks Construksion” sh.p.k.”, thuhet në vendimin e KRRT, referuar kompanisë përfituese që është në pronësi të Lul Morinës.
