Projekti i portit të ri në Porto Romano është përfunduar dhe në fillimvitin e ardhshëm do të hapet gara ndërkombëtare për të gjitha kompanitë që duan të marrin pjesë në këtë investim.
“Projekti do të hidhet në garë ndërkombëtare fillimvitin e ardhshëm dhe do të nisë zbatimin me çeljen e kantierit të Porto Romanos brenda vitit 2023. Një vepër me rëndësi kombëtare në funksion të tregut të përbashkët rajonal, projekti i Portit të ri Tregtar të Durrësit, integron hekurudhën Durrës – Prishtinë dhe Portet e thata në Kosovë e Maqedoni të Veriut”, thuhet në njoftimin e shpërndarë nga kryeministri Rama, bashkë me pamjet live nga prezantimi.
Ministrja Belinda Balluku në fjalën e saj gjatë prezantimit, u shpreh se porti i ri nuk do të jetë kopje e atij të Durrësit, por sipas saj, një investim strategjik që do të mbulojë nevojat e Shqipërisë, Maqedonisë së Veriut dhe Kosovës, për 4 dekadat e ardhshme.
“Është një projekt strategjik që do mbulojë nevojat e Shqipërisë, Maqedonisë së Veriut dhe të Kosovës, për 4 dekadat e ardhshme. Nuk është kopje e madhe e Durrësit, por investim i ri modern që do mbulojë kërkesat e 4 dekadave të ardhshme me një teknologji që nuk është aplikuar këtu. Në këtë investim 390 milion eurosh që punëson 1500 vetë, një vëmendje ka marrë ndërlidhja e terminaleve edhe hekurudhore”, tha Balluku.
- Porti i Durrësit është konsideruar nga opozita si afera më e madhe në 30 vitet e fundit:
Porti i ri në Porto Romano do të zëvendësojë Portin aktual të Durrësit që vitet në vijim do të transformohet totalisht. Projekti për portin e Durrësit u miratua në Parlament mes shumë kundërshtimesh nga opozita e cila e cilëson atë si aferën korruptive më të madhe të 30 viteve të fundit e cila tashmë ka marrë “ok” nga mazhoranca qeverisëse për t’i hapur rrugën ndërtimit të kullave nga biznesmeni arab Mohamed Alabbar.
Ndërsa gjithçka është ende në letër për projektin e transformimit të Portit të Durrësit, ka nisur shitja e apartamenteve në këtë zonë rezidenciale. Çmimet specifikohet në të do të fillojnë nga 110 mijë euro për sipërfaqet më të vogla. Apartamentet që do të ofrohen për blerësit në këtë zonë që pritet të transformohet janë me një, dy apo tre dhoma.
Për shitjen e apartamenteve në projektin që është në letër do të merren kryesisht çmimet e shitjes së apartamenteve në kryeqytet dhe variojnë nga 2000 euro për metër 2 deri në 3500 euro. Projekti është rreth 2 miliardë euro një pjesë e së cilës do mblidhen nga shitja e apartamenteve.
