Kreu i Partisë Demokratike, Sali Berisha në konferencën e sotme për mediat ka komentuar reagimin në Twitter të Ministrisë së Jashtme për nisjen e procedurave të zëvendësimit të ambasadores së SHBA, Yuri Kim.
Teksa Kim pritet të largohet në janar, kur edhe i mbaron mandati 3 vjeçar në krye të selisë diplomatike në Tiranë, Berisha tha me ironi se ajo është “flakur nga Edi Rama si limon i shtrydhur”.
“Nuk u habita për deklaratën e Edi Ramës me zëdhënësen Xhaçka, por me këtë rast dua të theksoj se kemi të bëjmë me një flakje të një limoni të shtrydhur. Në 100 vite marrëdhënie diplomatike mes dy vendeve, nuk ka pasur ndonjë diplomat që të ketë dëmtuar marrëdhëniet Shqipëri-SHBA më shumë se Yuri Kim. Sjelljet dhe veprimet e saj këtu nuk kanë asgjë të përbashkët me vlerat perëndimore të vendeve të lira, me parimet dhe nenet e konventave ndërkombëtareve të respektimit të respektimit të sovranitetit dhe ligjeve të një vendi, apo sistemit të drejtësisë dhe vullnetit të qytetarëve”, tha Berisha.
Por, Berisha nuk u ndal me kaq, pasi tha se Partia Demokratike do të kishte kërkuar largimin e ambasadores amerikane me protesta, pasi ajo është e vetmja diplomate në histori që ka dëmtuar marrëdhëniet midis Shqipërisë dhe SHBA.
“Sjelljet dhe veprimet e saj në Shqipëri nuk kanë asgjë të përbashkët me vlerat perëndimore të vendeve të lira, me parimet dhe nenet e konventave ndërkombëtare të respektimit të sovranitetit të një vendi, të respektimit të ligjeve të një vendi, por mbi të gjitha të respektimit të vullnetit të qytetarëve të zgjedhur. Ajo zhvilloi një veprimtari tepër të padenjë për përfaqësuesin e një vendi të lirë, vendi partner, vendi mik. I ka lejuar të thërrasë në radhë si të ishin ushtarë, deputetët e Kuvendit kundër Sali Berishës, duke i përpunuar dhe kërcënuar. Kërcënimet, ofendimet e saj ndaj demokratëve, se do hanë bar nëse mbështesin Sali Berishën, dhunimi flagrant i sovranitetit të një vendi duke kërkuar mosfutjen e Sali Berishës në Kuvend, pasi kishte marrë mandatin nga sovrani, thirrjet ndaj elektoratit se kë duhet dhe kë nuk duhet të votojë, kundërshtimi i çdo konvente me kërcënimet ndaj gjyqësorit, këto janë akte të shëmtuara të saj, për të cilat garantoj se po të ishin dy faktorë, ndjenjat dhe admirimi i imi dhe mbështetësve të mi ndaj SHBA, dhe agresioni barbar rus ndaj Ukrainës, zonja në fjalë nuk do të ishte toleruar kurrë. Me protesta paqësore, paqësisht do të ishte kërkuar largimi i saj sa më shpejt nga Shqipëria“, deklaroi lideri i opozitës.
