Data 6 dhjetor është vendosur zyrtarisht ditë pushimi vetëm në Tiranë.
Me vendim qeverie administrata, shkollat dhe të gjitha institucionet publike do të jenë pushim për shkak se në Tiranë do të mbahet Samiti i BE dhe Ballkanit Perëndimor. Ky vendim vjen për shkak të masave të sigurisë që janë marrë për ditën kur do të zhvillohet samiti, pasi në Tiranë do të mblidhen të gjithë liderët europianë.
45 delegacione pritet që të vijnë në kryeqytet për këtë samit. I gjithë bulevardi do të jetë me perimetër sigurie. Aty nuk do të lejohet të kalojë askush që është i paakredituar. Kurse qytetarët që duan të udhëtojnë drejt Rinasit, duhet të gjejnë rrugë të tjera alternative pasi rruga kryesore do të jetë e bllokuar gjithashtu.
Kujtojmë që ditën e Samitit të BE, opozita e udhëhequr nga Sali Berisha kanë thirrur një protestë kombëtare ku do të synohet që të informohen liderët e BE-së për problematikat e shqiptarëve, shpopullimin dhe aferat korruptive të qeverisë. Në krahun tjetër policia e shtetit ka refuzuar kërkesën e PD-së për të protestuar përballë Kryeministrisë me pretendimin se cënohet siguria kombëtare.
