Pas disa vitesh në pritje dhe shumë peripecive Kosovës zyrtarisht i është çelur drita jeshile, teksa ambasadorët e vendeve anëtare të Bashkimit Evropian janë pajtuar paraditen e sotme për t’i dhënë mandatin Këshillit Evropian që të negociojë procesin e liberalizimit të vizave me Parlamentin Evropian.
Teksti është përpiluar nga Republika Çeke, e cila mban edhe presidencën aktuale të BE-së, pas disa takimeve të grupeve punuese dhe diskutimeve dypalëshe me vendet që kanë pasur vërejtje.
Në dokumentin zyrtar përcaktohet se lëvizja pa viza për qytetarët e Kosovës do të jetë e mundur kur të hyjë në fuqi sistemi evropian i udhëtimit ETIAS (ashtu siç kishte propozuar Franca) dhe data për këtë është 1 nëntori i vitit 2023.
Edhe pse ETIAS pritet të nisë zyrtarisht vitin e ardhshëm, për Kosovën është parashikuar se në rast se do të ketë vonesa për sistemin, liberalizimi i vizave të hyjë në fuqi jo më vonë se 1 janari i vitit 2024.
Deri atëherë, Kosova duhet të synojë të ketë “marrëveshje apo aranzhime” për riatdhesim me ato vende të BE-së, me të cilat nuk i ka.
Kosovës, po ashtu, i kërkohet të vazhdojë të përshtasë politikën e saj të vizave me atë të BE-së, ndërkohë që i mbetet të kalojë edhe nëpër disa procedura të tjera që i kërkojnë vendet anëtare.
