Shpallet në kërkim Vladimir (Valmir) Kola, autori i dyshuar i vrasjes së Briken Sanajt, më 30 Tetor në Tiranë.
Në kërkim janë shpallur edhe dy persona të tjerë: Kened Antoni e Gjelosh Krasniqi, të akuzuar për mbështetje të autorit të krimit, i cili rezulton se është larguar nga vendi.
Gjykata e Tiranës ka pranuar kërkesën e prokurorisë për shpalljen në kërkim të autorit të dyshuar të vrasjes së Briken Sanajt në zonën e “Kodrës së Diellit”. Ndaj tij është marrë masa “arrest në burg” në mungesë.
Sipas hetimeve, nuk ndodhet në Shqipëri. Efektivët e policisë, pak ditë më parë, kanë shkuar për të ekzekutuar urdhër-arrestin në banesën e familjes në zonën e Shëngjinit në Lezhë, por nuk kanë gjetur personin e dyshuar.
Nga verifikimet e kryera ka rezultuar se autori i dyshuar i vrasjes ka dalë nga Shqipëria 2 ditë pasi ngjarja ka ndodhur. Tashmë emri i tij do ti dërgohet pikave kufitareve dhe aeroporteve me qëllim arrestimin e tij. Po ashtu, gjeneralitetet e tij i janë dërguar edhe Interpolit.
E njëjta masë është marrë nga gjykata edhe për dy persona nga Peja e Kosovës, të cilët dyshohet se kanë ndihmuar ekzekutorin.
Ata janë: Gjelosh Krasniqi 49 vjeç, i akuzuar për veprën penale “Përkrahja e autorit të krimit” dhe Kened Antoni, 25 vjeç, i akuzuar për veprën penale “Moskallëzimi i krimit”.
Vrasja
“Nga tërësia e veprimeve hetimore të kryera në funksion të procedimit penal të vitit 2022, ka rezultuar se shtetasi kosovar Kened Antoni i ka shitur automjetin shtetasit tjetër kosovar Gjelosh Krasniqi, më datë 24.10.2022, dhe po në këtë datë, këta shtetas e kanë futur këtë automjet në territorin e Shqipërisë dhe ia kanë vënë atë në dispozicion shtetasit Vladimir (Valmir) Kola, i cili e ka përdorur automjetin për realizimin e vrasjes së shtetasit Briken Sanaj.
Pas ngjarjes, autori i dyshuar e ka djegur automjetin, në rrugën dytësore Tiranë – Durrës, së bashku me armën e krimit. Për autorët e dyshuar të kësaj ngjarjeje janë kryer kërkime, si dhe është bërë shpallja në kërkim kombëtar dhe ndërkombëtar e tyre dhe në bashkëpunim me policitë homologe, po punohet për lokalizimin dhe kapjen e tyre”, njoftoi policia.
“Në cilësinë e provave materiale janë gjetur dhe sekuestruar 4 automjete të përdorura nga autori i dyshuar, para dhe pas ngjarjes, 10 aparate celulare, si dhe pamje filmike që i shërbejnë hetimit”, shtuan të njëjtat burime.
Motivi
Dyshimet janë se krimi ka ndodhur për hakmarrje.
Sipas raportimeve mediatike, në vitin 2010 familja Sanaj ka pasur konflikt me familjen Kola për shkak të ngacmimit të një vajze.
Konflikti u ashpërsua dhe vëllai i vogël i Briken Sanajt plagosi një prej djemve të familjes Kola. Mes familjeve thuhet se nisi një hasmëri që pavarësisht përpjekjeve për pajtim nuk u realizua. Ata raportohet se bënin lëvizje të kontrolluara, për shkak të këtij konflikti dhe nuk ekspozoheshin në publik.
