Gjendja në Shkodër duket e rënduar pas 24 orësh nën pushtetin e reshjeve të dendura të shiut.
Më shumë se 1000 hektarë tokë janë aktualisht të përmbytura kryesisht në fshatrat Obot, Muriqan dhe Oblikë ndërsa praktikisht qyteti mbetet i izoluar pas mbylljes së urës së “Baçallëkut”, e cila sipas kryetarit të bashkisë Bashkisë, Bardh Spahia nuk mund të aksesohet pasi paraqet rrezikshmëri të lartë.
Nga terreni ku po inspekton fshatrat e prekur më tepër prej motit të keq, Spahia sqaroi se zona e Nënshkodrës lidhet me qytetin vetëm nëpërmjet rrugës që përshkon Njësinë Administrative Guri i Zi, pra nëpërmjet Vaut të Dejës.
Situata e vështirë me të cilën po përballen autoritet lokale, kanë shtyrë Spahinë që të kërkojë shpalljen e gjendjes së emergjencës nga qeveria.
“Mënyra më e mirë për përballimin e situatave të tilla do duhet të ishte shpallja e gjendjes së emergjencës dhe prezencave autoriteteve të shtetit duhet të ishte që në momentin e parë. Dje kemi pasur mungesa si në mjete dhe në personel. Janë shtuar disi forcat e ushtrisë por duhen më shumë dhe personel i specializuar për raste të tilla. Kjo situatë kërkon vëmendjen e të gjithë institucioneve të shtetit. Do duhej me patjetër që dje të ishin shtruar forcat e ushtrisë dhe emergjencave civile dhe e mjeteve të posaçme”, tha Spahia.
Ai gjithashtu ka kërkuar më shumë mjetë të ushtrisë dhe të Emergjencave Civile, ndërsa drejtoi gishtin nga KESH për keqmenaxhim të situatës hidrike në kaskadën e Drinit, duke thënë se kanë përgjegjësi për përmbytjen pasi ndodhi në vetëm pak orë prej hapjes së pakontrolluar të portave të tre HEC-eve kryesore.
“Gjithçka është rezultat i hapjes në mënyrë shumë të shpejt, e papritur e portave të hidrocentraleve. Duhet ta kishin lajmëruar në kohë autoritet që menaxhojnë kaskadën e Drinit bashkinë për të njoftuar banorët. Rritja e nivelit të ujit ka qenë jashtëzakonisht e shpejtë. I mbajmë mend dhe përmbytjet e vitit 2010 por ato ishin për shkak të reshjeve të shiut përmbi 3 javë rresht pa pushim”, theksoi kryebashkiaku i Shkodrës.
