Breshëri dhe stuhia kanë përfshirë edhe qarkun e Korçës këtë të mërkurë, duke lënë pas dëme të konsiderueshme në bujqësi.
Sipas raportimeve, më e goditura rezulton fusha e Maliqit, ku vetëm pak minuta reshje intensive mjaftuan për të shkatërruar sipërfaqe të tëra me grurë, qepë dhe kultura të tjera sezonale.
Pak ditë para nisjes së korrjes, fermerët thonë se humbjet janë të mëdha. Në shumë parcela, kallinjtë e grurit janë rrëzuar plotësisht në tokë, duke e bërë thuajse të pamundur korrjen. Sipas tyre, në disa raste është humbur më shumë se gjysma e prodhimit.
Breshëri nuk ka kursyer as kulturat e tjera sezonale. Sipërfaqe të mbjella me qepë dhe produkte të tjera bujqësore janë dëmtuar nga moti i keq, duke shkaktuar humbje të konsiderueshme ekonomike për dhjetëra familje që jetojnë nga bujqësia.
Fermerët kujtojnë se edhe katër vite më parë u përballën me një situatë të ngjashme, ndërsa shprehen të shqetësuar se fenomenet ekstreme të motit po përsëriten gjithnjë e më shpesh, duke rrezikuar prodhimin dhe të ardhurat e tyre.
