Policia Rrugore e Tiranës ka bërë bilancin e javës që lamë për çdo shkelje të rregullave të qarkullimit rrugor, duke bërë me dije se janë goditur 10 raste te tentativës për të korruptuar punonjësit e Policisë, me qëllim shmangien e masave administrative për shkeljet e kryera.
Po ashtu bëhet me dije se 33 shtetas janë arrestuar për drejtim automjeti, në gjendje të dehur ose pa leje drejtimi.
Ndërkaq 250 leje drejtimi janë pezulluar, për drejtim mjeti nën efektin e alkoolit, për shpejtësi tej normave të lejuara dhe për shkelje të tjera të Kodit Rrugor.
E teksa policia bën bilancin, postoblloqet të ngritura në mënyrë abuzive në çdo rrugë po bëjnë namin.
Ndërkaq para disa ditësh, Alibeaj prezantoi në Komisionin për Veprimtaritë Prodhuese, Tregtinë dhe Mjedisin, projektligjin “Për disa ndryshime dhe shtesa në Ligjin 8378, datë 22.07.1998 “Kodi Rrugor i Republikës së Shqipërisë”.
Alibeaj theksoi se gjobat dhe masat e policisë për shkelësit e Kodit Rrugor nuk duhet të jenë represive dhe të kenë synim parandalimin e jo ndëshkimin.
“E kuptoj që për reduktimin e masave administrative synimi i shtetit do duhet të jetë parandalimi e jo ndëshkimi. Masat që kanë janë kthyer në masa represive, nuk janë në përputhje me kushtetutën gjoba apo masa që ndëshkojnë përdoruesit e këtij sektori. Masat represive do duhet të kenë synim jo thjesht ndëshkimin por parandalimin. T’i japim një fytyrë më qytetare shtetit në raport me qytetarin”, tha Alibeaj.
Ndërkohë policia rrugore gjendet e fshehur në çdo “skut” duke ngritur postoblloqe si në autostrada dhe në rrugë interurbane dhe ndalojnë qytetarët pa ndonjë arsyeje fikse, duke iu referuar vetëm “kontrolle rutinore”.
Propozimi i bërë për ndryshim në Kodin Rrugor, përmban detyrimin që ngritja e postblloqeve policore të bëhet vetëm me urdhër të arsyetuar nga drejtori i Policisë Rrugore, dhe për këtë është propozuar që ngritja e postblloqeve të bëhet me një urdhër të arsyetuar të drejtorit të Policisë Rrugore dhe së dyti, që mos të ngrihen në mënyrë abuzive.
Por kjo nuk mbaron këtu pasi problem shfaqet dhe pagesa e gjobave në kohë, falë dhe sistemit të “arrirë” që kemi i cili i nxjerr gjithmonë me vonesë gjobat në sistem.
Anëtarët e komisionit votuan pro në parim për nismën e Alibeajt mbi ndryshimet e propozuara për projektligjin, si edhe për bashkimin e të dyja nismave për t’u shqyrtuar si një e vetme.
