Nga Boldnews.al
Kthehet në parodi procesi gjyqësor ndaj anëtares së Komisionit të Vetingut, Etleda Çiftja, e akuzuar për “deklarim të rremë të pasurisë”.
Gjyqtari i Apelit të Posaçëm, Dhimitër Lara, dha dorëheqjen nga procesi gjyqësor kundër komisioneres, me argumentin se ajo ka qenë anëtare e trupës së rivlerësimit që e konfirmoi në detyrë, në maj të vitit 2019.
Ndërkohë që veprimi i Larës mund të konsiderohet korrekt dhe në zbatim me ligjin, kjo situatë forcon dyshimet mbi gjyqtarin Erjon Bani, i cili, megjithëse ishte në të njëjtat kushte, refuzoi të hiqte dorë nga gjykimi i Çiftes, duke e shpallur të pafajshme në 16 Shtator të këtij viti.
Etleda Çiftja ka qenë pjesë e trupës së Vetingut, që konfirmoi në detyrë gjyqtarin Erjon Bani, në 24 maj 2021.
Struktura e Posaçme Kundër Korrupsionit (SPAK), e cila kërkon shpalljen fajtore të Çiftjas dhe dënimin e saj me 1 vit e gjysëm burg, të konvertuar në shërbim prove, ankimoi vendimin e gjyqtarit Bani.
Seanca e parë në Apelin e Gjykatës së Posaçme u zhvillua këtë të Premte. Trupa gjykuese përbëhej nga gjyqtarët Miljana Muça, Dhimitër Lara dhe Daniela Shirka.
Në këtë seancë u pranua si palë e tretë edhe avokati Ndue Pjetra, kryetar i “Shoqatës së Avokatëve Kundër Korrupsionit”, i cili është një ndër kallëzuesit e Etleda Çiftjas dhe që i ishte refuzuar pjesëmarrja në procesin në shkallë të parë nga gjyqtari Erjon Bani.
Skandali i gjyqtarit Erjon Bani
“Boldnews.al” ka raportuar më herët se procesi gjyqësor penal ndaj Etleda Çiftjas u parapri me veprime të dyshimta për favorizimin e saj.
Çiftja akuzohet se ka falsifikuar dokumentat pronësorë, me qëllim fshehjen dhe deklarimin e rremë të burimeve të ligjshme për blerjen e dy sipërfaqeve tokë në Kryevidh të Kavajës.
Ajo, madje, e ka pranuar vetë se ka kryer veprime fiktive, duke paraqitur të dhëna të rreme edhe në një bankë të nivelit të dytë, me qëllim marrjen e një kredi.
Por, të gjitha këto fakte, të cilat SPAK-u i konsideroi vepra penale të dënueshme, u rrëzuan nga gjyqtari i posaçëm i shkallës së parë, Erjon Bani.
Përfshirja e Banit në këtë proces gjyqësor ishte një skandal i vërtetë procedurial dhe ligjor.
Ai ishte konfirmuar në detyrë nga një trupë e Komisionit të Pavarur të Kualifikimit, ku ishte pjesë edhe Etleda Çiftja.
Shqyrtimi i akuzave prej tij ndaj Çiftjas konsiderohet si rast flagrant konflikti interesi, pasi dukej qartë që kishte “një nder për t’i kthyer”.
Por, gjyqtari i “drejtësisë së re” vijoi shqyrtimin gjyqësor, rrëzoi të gjithë akuzat e provuara të SPAK-ut dhe shpalli të pafajshme Etleda Çiftjan.
Tashmë që çështja është në Apelin e Posaçëm, një tjetër gjyqtar, Dhimitër Lara, i konfirmuar në detyrë nga Etleda Çiftja, e konsideron veten si në konflikt interesi, dhe jep dorëheqjen nga trupa gjyqësore.
Seanca në Apel u shty për në datën 2 Dhjetor, ndërkohë që gjykata pritet të zëvendësojë anëtarin Dhimitër Lara.
Ky zhvillim në Apel nxjerr zbuluar gjyqtarin e shkallës së parë, Erjon Bani, i cili nuk bëri as përpjekjen minimale për të ruajtur pavarësinë.
Duket se ai ka qenë shumë borxhli ndaj Etleda Çiftjas, e cila e konfirmoi në detyrë, megjithëse gjyqtari Bani kishte “shumë skelete” në dollapin e tij të punës.
“Boldnews.al” ka raportuar mbi disa situata skandaloze të gjyqtarit Erjon Bani.
Në vitin 2016, kur ishte gjyqtar në Lezhë, Bani shpalli të pafajshëm një person për vrasje, i cili më pas u dënua me 18 vjet burgim nga Gjykata e Apelit të Shkodrës.
