Nga Boldnews.al
Gjyqtari i posaçëm, Erion Bani, shpalli të pafajshme anëtaren e Komisionit të Vetingut, Etleda Çiftja, në një vendim që duket një parodi e plotë.
Çiftja akuzohej nga Prokuroria e Posaçme për “deklarim të rremë të pasurisë” dhe “falsifikim dokumentash”.
Gjyqtari Bani, i cili më herët ishte konfirmuar në detyrë nga Etleda Çiftja, e konsideroi hetimin e prokurorisë “të tepërt” dhe se veprimet e kryera nga vetingasja si “të simuluara”, por jo “vepra penale.
“Boldnews.al” ka siguruar vendimin e Gjykatës së Posaçme. Në të gjenden edhe deklarimet e Çiftjas në Prokurori, ku pranon se ka kryer veprime fiktive për pasurinë e saj.
Për gjyqtarin Erion Bani, ajo nuk ka kryer falsifikim.
Më poshtë gjenden në mënyrë integrale përgjigjet që ka dhënë Etleda Çiftja në prokurori, për të kuptuar se sa i drejtë apo i gabuar është vendimi i gjyqtarit të posaçëm, Erion Bani.
Pyetje nr. 1: Në deklarimin tuaj Para Fillimit të Detyrës 2017 keni deklaruar: Apartament banimi, me sip.70.80 m2, Tiranë. Kontratë Shitje datë 30.11.2016 me vlerë 42 864 USD. (Vlera paguar në bazë të Kontratës së sipërmarrjes datë 8.9.2006).
Sqaroni lidhur me burimin e krijimit të këtij aseti në vitin 2006 në vlerën 42 864 USD, duke e shoqëruar sqarimin me dokumentacion justifikues. Sa kane qenë shpenzimet e mobilimit të këtij apartamenti?
Përgjigje nr. 1: Deklaroj me përgjegjësi të plotë që pagesa është kryer ne 2006 dhe jashtë zyrës. Pagesa është kryer ne USD dhe nuk e di pse është deklaruar ne Euro nga firma. Këtë e konfirmojnë Kontratat qe sapo dorëzova.
Ne kemi hyrë për të banuar në vitin 2006 dhe pagesat për mobilim kanë shkuar në shumën rreth 5 000 Euro. Burimi i pagesës ka qenë me kredinë e marrë në Emporiki Bank në dt.29.9.2006, në vlerën 35 000 Euro. Kjo shumë mbuloi edhe blerjen në vlerën 42.864 USD dhe shpenzimet e mobilimit.
Në Kontratën me bankën, meqenëse firma ende nuk e kishte të regjistruar në ZVRPP këtë pallat që po ndërtonte, unë nuk mund të merrja kredi me kolateral apartamentin dhe për këtë arsye vura si qëllim marrje kredi dhe kolateral, blerjen e një toke me sip. 3 440 m2 në Kryevidh, Kavajë.
Kjo toke u vlerësua nga ekspertet e Bankës ne vlerën 50 000 Euro.
Ne fakt, këtë tokë unë nuk kisha nevojë ta bleja, sepse ishte tokë në pronësi të babait tim, i cili e kishte përfituar me Ligjin 7501….
Pyetje nr. 2: Në deklarimin tuaj keni deklaruar: Arë me sip. 1 450 m2, me adresë Kryevidh, Kavajë, blerë me datë 10.7.2006 në vlerën 300 000 lekë, blerë me të ardhura nga paga; si edhe Arë me sip. 3 440 m2, me adresë Kryevidh, Kavajë, blerë më datë 10.7.2006 në vlerën 50 000 Euro, me burim kredi nga BIA, në shumën prej 35 000 Euro dhe 15 000 Euro të ardhura nga paga. Paraqisni dokumentacion vërtetues në lidhje me këto asete.
Sqaroni lidhur me burimin e krijimit të këtyre aseteve (kredi dhe paga) në vlerat 300 000 leke dhe 50 000 Euro, duke e shoqëruar sqarimin me dokumentacion justifikues (vetëm ne 2006 ju keni krijuar asete, në vlerën totale 10 527 717 leke, konvertuar ne Lekë me kursin e vitit).
Sqaroni pse keni deklaruar që toka në Kryevidh me sip. 3 440 m2 është blere ne masën 35 000 Euro nga kredia e marre ne ABI Bank, kur kjo bankë, në përgjigjen e dt. 8.8.2017, na konfirmon se kredia 35 000 Euro është marre në dt. 29.9.2006 për blerje apartamenti.
Përgjigje nr. 2: Për sipërfaqen e tokës 3 440 m2 e sqarova me lart kur shpjegova qëllimin e marrjes se kredisë ne Emporiki Bank. Pra kjo toke ishte e babait tim dhe qe te vihej Kolateral duhej të bëhej një Kontratë Shitblerje në emër tim si Blerës, që pastaj ta përdorja si Kolateral për marrjen e kredisë.
Pra kjo tokë nuk është blerë realisht nga unë, sepse kredia është marrë për apartamentin. Dhe toka e Dytë, me sipërfaqe 1 450 m2 nuk është blerë, por që të regjistrohej në emrin tim duhet të lidhja një Kontrate Shitblerje me tim atë që ishte pronar i kësaj toke.
Dhe për këtë toke nuk kam paguar asgjë. Babai im e ka përfituar këtë tokë njësoj si Tokën e parë, nga Ligji 7501.
