Kreu i grupit parlamentar të Partisë Socialiste, Taulant Balla ka ashpërsuar tonet ndaj ekspertëve të Bashkimit Europian të cilët i kanë dalë kundër mazhorancës që kërkon të votojë Amnistinë Fiskale.
Sipas Ballës, shumë vende të BE e kanë bërë vetë këtë amnisti, ndaj Shqipëria ka zgjedhur këtë moment për të shkak se nevojiten para, ndikuar nga situata e shkaktuar nga lufta në Ukrainë.
“Shqipërisë nuk i bën dot presion askush. Nevoja për amnisti fiskale është çdo ditë dhe më e madhe. Në vendet e BE kjo ka ndodhur. Në kushtet, edhe në Shqipëri, sikur vende të tjera, në kushtet e luftës, na duhet të sigurojmë të ardhura shtesë. Dua ta përshëndes vendimin e Qeverisë për të përfshirë taksën për tre prodhuesit e mëdhenj të energjisë.
Ne do punojmë me ekspertët e BE, për të konsoliduar një draft final për të adresuar të gjitha rekomandimet. Pra, nuk bëhet fjalë për presion. Interesi i Shqipërisë dhe shqiptarëve është interesi themelor në punën tonë të përditshme. Një ligj për Amnisti Fiskale është një domosdoshmëri për t’u ndarë nga vitet e tranzicionit. Për ne, mbetet prioritet miratimi sa më shpejt të jetë e mundur, një variant përfundimtar për amnistinë fiskale”, u shpreh Taulant Balla.
- BE dhe SHBA kundër Amnistisë Fiskale:
Në një kohë që kryeministri Edi Rama ka dalë me ”shpatë” në dorë për të sulmuar BE dhe SHBA për qëndrimin e tyre ndaj nismës që do t’i hapte rrugën legalizimit të parave të pista në ekonominë shqiptare, përfaqësuesja e FMN-së Yan Sun ka kritikuar qeverinë për nismën e Aministisë Fiskale.
Ajo çka FMN i propozon qeverisë shqiptare si zgjidhje në këto kushte kur Rama kërkon me ngulm Amnistinë Fiskale, është një program Vetëdeklarimi Vullntear i të ardhurave, por që edhe për këtë Shqipëria duhet të plotësojë një sërë kriteresh përpara realizimit.
