Kreu i Grupit Parlamentar të PS, Taulant Balla është pyetur në daljen e sotme për mediat lidhur me reformën territoriale dhe votimin elektronik në zgjedhje, pasi KQZ kërkoi alokimin e një fondi prej 3 miliardë lekë për t’i çelur dritën jeshile procesit në6 bashki të mëdha.
Balla sqaroi se më 14 Maj do të votohet në 61 bashki pasi nuk pati konsensus për të shkuar në ndryshime ligjore për reformën administrative territoriale.
“Komisionet e Posaçme ndryshojnë nga komisionet hetimore. Komisionet e posaçme votojnë projektligjet që burojnë nga puna e tyre. Në komisionin e posaçëm të reformës administrative territoriale nuk pati konsensus për të shkuar në ndryshime legjislative. Raportet e tyre janë administruar si raporte të maxhorancës dhe opozitës dhe kjo është një çështjes e mbyllur. Nuk do ketë votim raportesh. Do kishte votim nëse do kishte amendamente në ligjin për reformën administrative territoriale. Nuk ka më kohë për këtë çështjes (negociata). Më 14 maj në Shqipëri do votohet në 61 bashki”, deklaroi Balla.
Lidhur me fondin e kërkuar nga KQZ, Balla edhe pse theksoi se qeveria me Buxhetin 2023 do t’i japë prioritet përballimit të krizës ekonomike dhe energjetike, nënvizoi se ka vend për tolerim.
“Ajo që unë po ju them është që Shqipëria nuk bën asnjë përjashtim nga vendet e tjera që përballet me inflacionin e luftës. Fokusi ynë kryesor është që të mos lëmë pa mbështetje familjet me ndihmë ekonomike. Kujtoj që 3 miliard lekë ose më pak se 30 milionë dollar edhe një shumë kolosale. Por kjo është një gjë që duhet të diskutohet. Votimi elektronik ka qenë diçka tepër pozitive dhe duhet marrë në konsideratë. KQZ ta konsiderojë se në cilën bashki duhet vendosur. Dy gjëra janë kryesore për të ardhmen depolitizimi i komisioneve zgjedhore dhe votimi elektronik. Edhe përsa i përket sulmeve kibernetike, këto janë të sigurta sepse janë offline”, tha ai.
