Nga Boldnews.al
Instituti i Statistikave në Shqipëri ka dhënë shifra alarmante për betonizimin e Tiranës. Pallate dhe komplekse shumëkatëshe janë ndërtuar dhe po ndërtohen në kryeqytet, duke zhdukur edhe ato pak parqe të mbetura. Nga zona e Parkut, në qendër, te Komuna e Parisit, Farkë, Sauk, Ali Demi, Laprakë, e në çdo lagje, kanë “mbirë” pallatet, duke e kthyer Tiranën në “kryeqytetin e betonit”.
Deklarata e Lali Erit në 2015-ën se “s’kam ndërmend të hyj në histori si njeriu që ndërtoi pallate” është venitur me kohë, pasi Tirana e dikurshme as nuk njihet, pasi janë shembur godinat e vjetra, ndërkohë edhe ato që kanë mbetur, janë në “hijen” e grataçelave.
Por, shikoni se ç’bën kryetari i Bashkisë së Tiranës?!
Në vitin elektoral, ai do të shpenzojë plot 3 milionë euro për propagandën e “pyllit orbital”. Themi “propagandën”, pasi fushatat e mëparshme kanë qenë të kota, ku janë mbjellë pemë në parqe dhe jo në zone të shkreta!
Para pak javësh, Presidenti i Republikës, Bajram Begaj, dekretoi datën 14 maj 2023 si datë të zgjedhjeve lokale. Partitë politike kanë filluar që tani pregatitjet për këtë fushatë, teksa PD-ja ka hapur primaret, ndërkohë që kampi tjetër ka mobilizuar fondet publike për interesa personale të kryetarit aktual, Erion Veliajt.
Sipas dokumenteve që disponon BoldNews.al, Drejtoria e Përgjithshme e Pastrimit dhe Gjelbërimit në Tiranë, një institucion në varësi direkte nga Bashkia e Tiranës, ka hapur një tender të majmë për blerje pemësh. Objekti i tenderit është “blerje pemë dekorative për pyllin orbital dhe në zona të ndryshme të Tiranës”. Fondi për këtë procedurë është plot 300.000.000 lekë, ose me TVSH rreth 3 milionë euro.
Nisur edhe nga objekti, bëhet fjalë për të ashtuquajturën nismë të Veliajt të para disa viteve, nismë e cila jo vetëm është venitur, por edhe i ka “dalë boja”. Por, duke parë mobilizimin e PD-së me primaret, Veliaj këto kohë do të jetë me lopata dhe kasma në dorë. Megjithatë, betoni dhe pallatet janë aq evidente sa edhe shkurret që do të mbjellë Veliaj nuk mund t’u zënë pamjen. Por, kryetar i dashur, nuk mund të mbulohet jashtëqitja me këto shkurre, pasi pamja dhe era do të jenë sërish!
